27 января 2009 г.
Сывлăхăмăр çирĕплĕхĕ хамăртан килет (Здравоохранение)
Чăваш Республикин Президенчĕ кăçал та пирĕн ума пысăк тĕллевсем лартрĕ. “Чăваш Ен ытларах çитĕнÿсем тутăр тесен, кашни çыннăн пуçаруллă пулмалла”,–тет вăл. Çырура чылай ыйту хускатать республика ертÿçи.
“Пурнăçлакан ĕçсене тата йышăннă программăсене пăхмасăр пирус туртасси хăнăхнă йăла пулма пăрахмасть. Яваплăха туйман, хăйсен сывлăхне сиен кÿрекен çамрăк çынсем çумне хĕрсем те – пулас амăшĕсем – хутшăнаççĕ. Вĕренÿ тата сиплев учрежденийĕсен администрацийĕсем çак усал йăла çине çиелтен пăхаççĕ”,– тенĕ Патшалăх Канашне янă Çырура. Пирĕн районта та çук мар ку тĕслĕх, хăш-пĕр вĕренекенсем вăрттăн вырăнсене пытанса туртаççĕ. Ачисенчен пирус шăрши кĕнине сиссен те ашшĕ-амăшĕ тивĕçлĕ мера йышăнмасть.
Çавăн пекех Чăваш Президенчĕ сăра-эрехе обществăлла вырăнсенче ĕçесси сарăлсах пынине палăртать. Тăвай енре те уяв кунĕсенче ĕçкĕçсем янăрашнине илтме пулать. Магазин умĕнче е автовокзалрах ĕçеççĕ хăшпĕрисем, çавăнтах выртса çывăракансем те пур. Вырăнти влаçпа унăн представителĕсем, милиципе общественноç киревсĕр йăласене хирĕçлес енĕпе çителĕксĕртерех ĕçленинчен те килет ĕнтĕ ку. Хамăр сывлăхшăн хамăрăнах тăрăшмалли пирки тепĕр хут аса илтерет çапла Чăваш Президенчĕ.
Т.ИГНАТЬЕВА, врач–нарколог.
Источник: "Ял ĕçченĕ"