23 января 2009 г.
Хĕллехи сезон уçăлчĕ (Спорт)
Иртнĕ шăматкун йĕл-тĕрçĕсем аранах хĕллехи сезона уçрĕç. Çур хĕл хыçа юлчĕ темелле, анчах ниепле те йĕлтĕр йĕрĕ хывмалăх юр ÿкмест. Юрать ăмăртусем умĕнхи каç юр сийĕ кăшт хулăмланчĕ. Çанталăкĕ те йĕлтĕрçĕсемшĕн сиввех пулмарĕ.
Ăмăртусене тĕрлĕ ÿсĕмри йĕлтĕрçĕсем хутшăнчĕç: 4–5 классенче вĕренекенсенчен пуçласа предприятисемпе организацисенче ĕçлекенсем таранах. Кĕçĕн ÿсĕмри ачасем хушшинче 1 километра чупассипе В.Конова (Тăрмăш шкулĕ), Е.Краснова (Тĕмер), Н.Спиридонова (Йăнтăрчă), А.Григорьев (Нăрваш), В.Сучков (Пуянкасси), Д.Данилов (Тăрмăш) мала тухнă.
6–7 классем хушшинче (2 км), Н.Моисеева (Тушкил), Е.Михайлова (Нăрваш), И.Кириллов (Тăрмăш), Е.Васильев (Эльпуç) çĕнтернĕ. Çак дистанцирех 8-9 классенче вĕренекенсем вăй виçнĕ. Тĕпрен илсен, ку ÿсĕмре тăрмăшсемпе эльпуçсем палăрнă. Малтисен шутĕнче Н.Гавриловапа А.Максимов (Эльпуç), В.Звонаревпа О.Иванова.
10-11 классенче вĕренекен яшсем 3 километра чупнă. Дистанцие А.Егоров (Нăрваш) чи лайăх вăхăтпа вĕçленĕ. Н.Ивановăн (Пуянкасси) 2-мĕш, Р.Ушмаринăн (Тăрмăш) 3-мĕш вăхăт. Хĕрсенчен 2 километрлă дистанцире чи хăвăртти О.Максимова (Эльпуç) пулнă. К.Матросова (Тушкил шкулĕ) 2-мĕш вырăн йышăннă.
Вĕрентекенсем хушшинче Çĕнĕ Пуянкасси шкулĕ çĕнтернĕ. Тăрмăшсен 2-мĕш, йăнтăрчăсен 3-мĕш вырăнсем.
Предприятисемпе организацисен ушкăнĕнче “Дорстрой” тулли мар яваплăхлă общество, шалти ĕçсен пайĕн, тĕп больницăн командисем малта.
Ял поселенийĕсем хушшинче тушкилсемпе пуянкассисем тата нăрвашсем палăрнă.
Йĕлтĕр йĕрĕ çине район администрацийĕн пайĕсенче ĕçлекенсем те тăчĕç. Чи маттурисем – вĕрентÿ пайĕнче ĕçлекенсем. Район пуçлăхĕн команди 2-мĕш, социаллă тивĕçтерÿ центрĕн команди 3-мĕш вырăнсенче.
В.КУЗНЕЦОВ, ДЮСШ директорĕ.
Источник: "Ял ĕçченĕ"