23 января 2009 г.
Район пуçлăхĕ пачăшкăсемпе тĕл пулнă (Общество)
Турă шыва кĕнĕ кун район ертÿçи Н.Иванов районти чиркÿсен настоятелĕсемпе тĕл пулса калаçнă. Тĕл пулăва Тăвай чиркĕвĕн пачăшки Николай атте, Нăрваш чиркĕвĕн пачăшки Георгий атте, Мучар чиркĕвĕн пачăшки Владимир атте, Тушкилпе Тăрмăш чиркĕвĕсен пачăшки Сергий атте, депутатсен районти Пухăвĕн председателĕ Ю.Алексеев тата тĕн пĕрлешĕвĕсене килĕштерсе ĕçлессишĕн яваплă районти канашĕн председателĕ В.Шакров хутшăннă.
Район пуçлăхĕ Н.Иванов хăнасене районăн социаллă пурнăçĕпе экономика аталанăвĕ çинчен каласа кăтартнă, умра тăракан задачăсемпе паллаштарнă. Район аталанса пынине тĕслĕхсемпе çирĕплетнĕ.
Николай Ильич çавăн пекех пурнăçри хăш-пĕр йывăрлăхсем çинче чарăнса тăнă, районти ĕç тăвакан власть органĕсем духовенство представителĕсемпе пĕрле куллен ĕçлесе пырсан вĕсене сирсе яма май пуррине палăртнă. Сăмахран, Н.Иванова ĕçлес ÿсĕмри вăй питти çынсем пурнăçран ир уйрăлса кайни хытă пăшăрхантарать.
Тĕл пулу сĕтел хушшинчи ирĕклĕ калаçура иртнĕ. Пачăшкăсем те район пуçлăхне хăйсене кăсăклантаракан ыйтусем панă. Николай Ильич настоятельсене Тăвай чиркĕвĕн çĕнĕ çуртне туса пĕтерессине хăвăртлатмалли майсене пĕрлехи вăйпа шырама сĕннĕ. Калаçу вăхăтĕнче çавăн пекех пĕрлехи ĕçри ытти ыйтусене те хускатнă. Вĕсенчен пĕри районта пурăнакансене йĕркелĕхе, ыр кăмăллăха, тÿсĕмлĕхе вĕрентесси. Настоятельсем хăйсен енчен ялсене тирпей-илем кĕртессипе халăх хушшинче тĕллевлĕ ĕçлесе пынине асăннă. Ÿлĕмрен ял поселенийĕсен пуçлăхĕсемпе Турă шыва кĕнĕ кун тĕлне çынсем валли шыва кĕмелли вырăнсем хатĕрлеме, шкулта вĕренекенсемпе харпăр хăйне йĕркеллĕ тытас, ыр кăмăллăха вĕрентес тĕлĕшпе ятарлă уроксем ирттерме кăмăл пуррине палăртнă. Çавăн пек уроксем çамрăксене обществăри тÿнтер, сиенлĕ витĕмрен пăрнă пулĕччĕç.
Л.ПАВЛОВА. В.ЧАЙКИН.
Источник: "Ял ĕçченĕ"