23 января 2009 г.
Çамрăксен çулталăкне уçрĕç (Общество)
Район администрацийĕн пĕчĕк залĕнче пухăннă шкулсенчи пуçаруллă вĕренекенсем, тĕрлĕ организацисенчи харсăр каччăсемпе хĕрсем хушшинче ларнă май чунра ырă туйăм çуралчĕ иртнĕ юнкун. “Пуласлăхăмăр тилхепине иккеленмесĕрех шанса пама пулать вĕсене, ашшĕ-амăшĕн е аслашшĕ-асламăшĕн ĕмĕчĕсене пурнăçа кĕртме пултараççех вĕсем, малашлăхăмăра çутăрах та тăвĕç“, – текен шухăш вĕçсе иртрĕ пуçра.
Раççей Президенчĕ Дмитрий Анатольевич Медведев кăçалхи çула çамрăксене халалламалли Указ кăларни те ахальтен мар ĕнтĕ. Каччăсемпе хĕрсене май килнĕ таран пулăшмалла аслисен. Обществăшăн вăй-халне шеллемен, лайăх ăру хăвармалла хамăр хыççăн.
Çамрăксен çулталăкне пирĕн районта официаллă майпа уçма пĕрлехи информаци кунне килнисем – ЧР Патшалăх Канашĕн депутачĕ Г.Васильев, ЧР вĕрентÿпе çамрăксен политикин министерствин управлени пуçлăхĕ М.Федотов, ЧР суд департаменчĕн управлени пуçлăхĕ В.Петров, ЧР Патшалăх статистики федераллă службăн территорири органĕн ертÿçин çумĕ Л. Егорова, “ЧР Кадастр палати” федераллă учрежденийĕн директорĕ Т.Моисеева, культура министрĕн çумĕ А.Белов тата район пуçлăхĕ Н.Иванов, район администрацийĕн вĕрентÿпе çамрăксен политикин пайĕн начальникĕ В.Шакров та хутшăнчĕç.
Малтанах Тăвай енри каччăсемпе, хĕрсемпе ĕçлекен Т.Шашкова специалист пухăннисене Çамрăксен çулталăкĕ пуçланнă ятпа саламларĕ, вĕренÿре тата ĕçре ăнăçусем сунчĕ.
Район пуçлăхĕ Н.Иванов сăмах илчĕ çакăн хыççăн. “Пирĕн, аслисен, çамрăксене тĕрĕс çул кăтартса пымалла, вĕсене хăйсен вăй-халне кирлĕ çĕре яма хăнăхтармалла”, – çапла пуçларĕ калаçăвне Николай Ильич.
Пирĕн районта 14–30 çулсенчисем 4712 çын пурăнать, вĕсенчен 40,5 проценчĕ ĕçлет, 39 проценчĕ вĕренет. Пĕлтĕр “Çамрăк çемье” ятлă республикăри программăпа килĕшÿллĕн районти 11 çамрăк çемьене пулăшнă. “Пурăнмалли çурт-йĕр” федераллă программăпа – 27 çемьене. Талантлă, активлă хĕрсемпе каччăсене хăйсен шухăшĕсене пурнăçа кĕртме пур çĕрте те условисем туса пама тăрăшаççĕ халь. Пуçаруллисене республикăра та, районта та адреслă пулăшу параççĕ. Тăвайри шкулта 11 класра вĕренекен С.Кузьмина çĕршыври олимпиадăра малти вырăн йышăннăшăн Раççей Президенчĕн премине панă. 2003-2008 çулсенче пирĕн районта 35 çамрăк ЧР Президенчĕн стипендине тивĕçлĕ пулнă. Вĕсенчен 22-шĕ – ĕçлекеннисем. Кăçал ку сума Н.Александрова библиотекарь (Сăхăтпуç), А.Афанасьев механизатор (”Акконд-агро фирма” УАО), И.Игнатьевапа С.Кузьмин (Тăвай), Е.Муханова (Мучар), Е.Семенова (Йăнтăрчă) вĕренекенсем, С.Сергеев механизатор (”Новый путь”) тивĕçлĕ пулчĕç. Стипенди виçи – 1830 тенкĕ. 2004 çултанпа Тăвай енĕн 20 ĕçлекен çамрăкне район пуçлăхĕн премине панă.
Çакнашкал хавхалантару районăн экономикипе социаллă политики валли çĕнĕ кадрсем хатĕрлеме май парать.
ЧР Патшалăх Канашĕн депутачĕ Г.Васильев та тухса калаçрĕ, кăçалхи çĕнĕлĕхсемпе паллаштарчĕ, ыйтусем çине хуравларĕ.
Çÿлерех асăннă стипендиатсене свидетельствăсем тата чĕрĕ чечек çыххисем пачĕç Николай Ильичпа Генрих Геннадьевич çакăн хыççăн.
Пĕрлехи информаци кунне килнисем организацисенчи коллективсемпе тĕл пулма васкарĕç кĕçех.
Пухăннисем Раççейри конкурссен лауреачĕсен, “Тайна” тата “Забава” ансамбльсен пултарулăхĕпе кăмăллă юлчĕç, алă çупса тав турĕç.
Çавра сĕтел хушшинчи хĕрсемпе каччăсем кайран çулталăкри мероприятисене сÿтсе яврĕç, Татьянăсен кунне çамрăксене активлă хутшăнтарма палăртрĕç. Оборонăпа массăллă ĕç уйăхлăхĕ çывхарни пирки асăнчĕç. Районти çамрăксен правительствин йышне пăхса тухрĕç, улшăнусем кĕртрĕç. Çамрăксен çулталăкне Шупашкарта уçнă çĕре хутшăнма тивĕçлисене суйларĕç.
А.НИКИТИНА.
Источник: "Ял ĕçченĕ"