30 апреля 2009 г.
Республикăри паллă атлета чысласа (Спорт)
Апрелĕн 25-мĕшĕнче Тăвайри культура çуртĕнче кире пуканĕ çĕклессипе республикăра пуçласа спорт мастерĕн ятне тивĕçнĕ, пĕр хутчен çеç мар республика чемпионĕ тата рекордсменĕ, Раççей чемпионĕ пулнă Альфред Александрович Пимулина чысласа кире пуканĕ çĕклекенсен республикăри турнирĕ пулчĕ. 15 командăран 100 ытла атлет хутшăнчĕ. Килнĕ хăнасен йышĕнче паллă спортсменсене, мастерсене, помост çине пирĕн ентешпе пĕр вăхăталла тата каярахри çулсенче тухнă Ю.Карпов (ЧР кире спорчĕн федерацийĕн Президенчĕ), В.Притуленко, Б.Глинкин мастерсене, Павловпа Жиряков кандидатсене курма пултартăмăр. Альфред Александровича хисеплесе атлетсем кÿршĕ республикăсенчен те килнĕ. Спортсменсене район пуçлăхĕ Н.Иванов саламласа çирĕп сывлăх, ăнăçусем сунчĕ. Альфред Александрович хăйне чыс туса килнĕшĕн пурне те тав турĕ.
Ăмăртусем интереслĕ те çивĕч иртрĕç, вĕсене хĕрсемпе хĕр арăмсем те хутшăнчĕç. Пултаруллă Елчĕк районĕн команди хыççăн тăвайсем 2-мĕш вырăн йышăнчĕç, 3-мĕш вырăнта – Канаш районĕн команди. Мала тухнă командăсене дипломсемпе медальсем тата парнесем парса хавхалантарнă. Тăвай районĕн чысне тĕрлĕ виçере Андрей Трофимов студент (Тушкил), Кирилл Кириллов (1-мĕш вырăн, Тăвай шкулĕ), Эдуард Буинцев, Евгений Кириллов (2-мĕш вырăн), Леонид Леонтьев (3-мĕш вырăн) тата ыттисем хÿтĕленĕ.
Малашне республикăри турнира çуллен ирттерме палăртнă.
О.ЛОМОНОСОВ.
Источник: "Ял ĕçченĕ"