21 апреля 2009 г.
Шкул пуласлăхĕ – пултаруллă учительсенче те (Образование)
Татьяна Геннадьевна Яковлевана Тĕмер шкулĕнче ĕçлеме пуçличчен пурнăç сукмакĕ таçта та илсе çитернĕ. Çĕпĕрте çуралса Краснодар крайĕнче çитĕннĕскер, Тăвай районĕнчи Кармал каччипе пĕрлешсе çемье çавăрнă. Ял хуçалăх техникумĕнче агроном профессине алла илнĕ, Шупашкарти педагогика институчĕн художествăпа графика факультетĕнчен вĕренсе тухнă. Нумай çул хушши Кармал шкулĕнче ИЗО тата ĕç урокĕсене ертсе пынă. Ун чухнех унăн пултарулăхĕ районта çеç мар, республикăра та палăрнă. Татьяна Геннадьевна хăйĕн ĕçне юратса туни куçкĕретех. Ачасем те ăна кăмăллаççĕ. Кашни урокра тенĕ пекех çĕнĕрен те çĕнĕ япаласем тума хăнăхаççĕ.
Унăн вĕренекенĕсем олимпиадăсене, конкурссене хутшăнаççĕ. Акă технологи олимпиадине кăçал 5 ача хутшăнчĕ, вĕсенчен 4-шĕ малти вырăнсене йышăнчĕ.
Кăçалхи вĕренÿ çулĕнче Т.Яковлева вĕренекенĕсем республикăри “Çул çинчи хăрушсăрлăхшăн”, районти “Эпир наркотиксене хирĕç”, “Анне чĕри”, “Симĕс планета” конкурссенче малти вырăнсене çĕнсе илчĕç.
Татьяна Геннадьевна – пултаруллă вĕрентекен. Уроксем хыççăн “Ăста алăсем” кружок ирттерет. Хаваспах çÿреççĕ унта ачасем.
Çак кунсенче Тĕмер ачисем тăварлă чустаран, туалет хутĕнчен, йывăçран ăсталанă япаласемпе республикăри ачасем те паллашрĕç. Чăваш телевиденийĕн “Шевле” программи ача-пăча интереслĕ передача хатĕрлесе кăтартрĕ.
Р.ЯКУРКИНА, шкул директорĕн вĕрентÿпе воспитани енĕпе ĕçлекен çумĕ.
Источник: "Ял ĕçченĕ"