07 апреля 2009 г.
Талантлă ĕçтешĕмĕре асăнса (Культура)
Пĕтĕм тĕнчери театр кунне халалласа Енĕш Нăрвашри тĕслĕх библиотекинче йывăр чире пула пирĕнтен вăхăтсăр уйрăлса кайнă культура ĕçченĕн Н.Шутовăн асăну каçне йĕркелерĕмĕр. Унта ытларах Николай Андреевичпа пĕр вăхăталла ĕçленĕ, пултарулăх ĕçне хастар хутшăннă, ăна лайăх пĕлнĕ çынсем хутшăнчĕç. Чăваш АССР культурăн тава тивĕçлĕ ĕçченĕ пирки ăшă сăмах нумай пулчĕ çав каç. Н.Шутов культурăна аталантарас ĕçе чăннипех пысăк тÿпем хывнă. Концертсемпе, спектакльсемпе ял-йыша кăна мар паллаштарнă, таврари ялсене çаврăннă, тулай чăвашсем патне çитнĕ. Сакăрвуннăмĕш çулсенче ялти драмколлектив халăх театрĕ ята тивĕçрĕ. Нăрвашсем Николай Андреевич ĕçне халĕ те малалла тăсаççĕ, алăран ÿкермеççĕ.
Асăну каçне ял поселени пуçлăхĕ Р.Кузьмина, Майя Дмитриевнапа Юрий Палладьевич Арестовсем, С.Г.Данилова, З.В.Герасимова, Г.Н.Сергеева тата ыттисем хутшăнчĕç. Мăшăрне Зинаида Петровнана та чĕннĕччĕ, анчах килеймерĕ, Андрей ятлă ывăлĕ, тăванĕсем хутшăнчĕç. В.Степанова худрук ырă çын пирки куççуль витĕр каларĕ. Сысна ферминче ĕçлесе пенсие тухнă, пултарулăх ĕçĕн чи хастар çыннисенчен пĕри пулнă Маруç аппан та аса илмелли сахал мар пулчĕ. (М.Михайлова). Шкул директорĕ О.Ярмулин тĕрлĕ çулсенчи сăн ÿкерчĕксенчен сайт хатĕрленĕ. Музей директорĕ В.Петров Николай Андреевич вылянине, юрланине видеокамера çине ÿкерсе илнĕ самантсене кăтартрĕ. Асăну каçĕнче çавăн пекех тĕрлĕ спектакльсенчи сыпăксем пулчĕç. Ю.Арестовпа Г.Сергеева “Кай, кай, Ивана”, Т.Антонова “Карчăксем качча каяççĕ” (Ф.Буляковăн), Вяч. Ефимов “Çĕнĕ ĕмĕрти хуняçа” (А.Суханăн) спектакльсенчи сыпăксене выляса пачĕç.
Николай Шутов сцена çинче те, пурнăçра та талантлă çын, лайăх организатор пулнă. Фермăра ĕне сăваканран вăл культура-çут ĕç училищинчен, каярах культура институтĕнчен вĕренсе тухрĕ, вăрах вăхăт ялти культура çуртне ертсе пычĕ, Чăваш АССР культурин тава тивĕçлĕ ĕçченĕ пулса тăчĕ. Унăн ĕмĕчĕсене паян ялти çамрăксем пурнăçа кĕртеççĕ.
З.ВАСИЛЬЕВА, халăх театрĕн режиссерĕ.
Источник: "Ял ĕçченĕ"