03 апреля 2009 г.
Çăмăллăхлă кредит илсе аталантараççĕ (Общество)
Патшалăх “АПК аталанăвĕ” наци проекчĕн никĕсĕ çинче çынсен хушма хуçалăхĕсене аталантарма çăмăллăхлă кредитсем парса пулăшма тытăннăранпа ку çăмăллăхпа нумайăшĕ усă курчĕ. Паян кун та хаклаççĕ ЛПХ кредитне çынсем. Унпа “Россельхозбанкăн” Тăвайри филиалĕ те, Раççей Перекет банкĕн Тăвайри хушма офисĕ те, кооператив та тивĕçтереççĕ.
–Çынсем кăçал та, иртнĕ çулсенчи пекех, ЛПХ кредичĕ илсе, техника, выльăх-чĕрлĕх витисем тума строительство материалĕсем, çуракинче кирлĕ хатĕрсем туянаççĕ, – терĕ Перекет банкĕн Тăвайри хушма офисĕн заведующийĕ А.П.Краснов. Вăл каланă тăрăх, кунта асăннă кредитпа 15,5 процент çинчен тивĕçтереççĕ. Тĕп банкăн рефинансировани ставки 13 процент пулнине шута илсен, заемщикĕн кредит суммин тÿлевне 2,5 процент çинчен кăна тавăрса памалла пулать. Ку вăл кредит илекеншĕн пысăк çăмăллăх ĕнтĕ.
–Пирĕн ял поселенийĕн территорийĕнче пурăнакансем кăçал та халичченхи пекех ЛПХ кредичĕ илеççĕ. Андреевсем акă Перекет банкĕн пулăшăвĕпе усă курса мотоблок туянса ячĕç, – пĕлтерчĕ Чутей ял поселенийĕн пуçлăхĕн çумĕ В.В.Куприянова.
Çапах та унччен кредит илнĕ çынсене патшалăх кăçал процент ставкисене вăхăтра субсидилеме тытăнманни питĕ пăшăрхантарчĕ. Халĕ ăна федераллă тата республика бюджечĕсенчен куçарса панă, вĕсене илсе, кредитсене халичченхи пекех çăмăллăхлă условисемпе тÿлесе татса пыма пулать.
И.ГЛАДКОВ.
Источник: "Ял ĕçченĕ"