03 апреля 2009 г.
Вăрлăхран нумай килĕ (Сельское хозяйство)
Уйсем юртан тасалса пынă май çуракине хатĕрленес ĕçсене те кал-калрах туса пыма тăрăшаççĕ çĕр ĕçлекенсем. Ленин ячĕллĕ ял хуçалăх кооперативĕпе “Акконд-агро фирма” обществăра акă хальхи вăхăтра пикенсех малтан тасатса çитереймен вăрлăхсене сортласа хатĕрлеççĕ. Тăрмăшсен, тĕслĕхрен, урпа вăрлăхĕ ака кондицине ларнă, халĕ çурхи тулла аллаççĕ. Агрофирмăн Тăвайпа Улянкăри йĕтемĕсенче ĕçсем пыраççĕ. Мĕн акатăн, çавă шăтать тенине асран кăларма çук çĕр ĕçлекенсен. Районĕпе ку вăхăт тĕлне мĕнпур вăрлăхсен 76 процентне ака кондицине çитернĕ.
“Дружбăра” та çурхи тĕш тырă вăрлăхĕсене сортласа хатĕрлемелле. Кăçал акса вăрлăхлăх ĕрчетме кĕршесем Эльф сортлă элита вăрлăх та 10 тонна туяннă. Ку вăл сăра тума юрăхлă сорт шутланать.
Чутейсен кăçал акса тума тĕш тырă вăрлăхĕсем сахал. Çакна шута илсе тата халичченхинчен чылай ытларах та акас тĕллевпе вĕсем Вăрнар районĕнчи вăрлăх ĕрчетекен “Санары” хуçалăхран 120 тонна çурхи тулă вăрлăхĕ илсе килме палăртаççĕ. Унăн пахалăхне тĕрĕслеттернĕ. Вăл Эстер сортлă çурхи тулă. Пысăк тухăç паракан лайăх сорт шутланать. Ытти хăш-пĕр хуçалăхсем те вăрлăхсем кÿрсе килес ĕмĕтлĕ.
В.СИНЯКОВ, “Россельхозцентрăн” Тăвайри филиалĕн ертÿçи.
Источник: "Ял ĕçченĕ"