24 октября 2008 г.
“Акконд-агро фирма” АУОн выльăх-чĕрлĕх комплексне хута янăранпа икĕ уйăх ытла иртрĕ. Пысăк комплекс ăнăçлах ĕçлесе кайрĕ темелле, уйрăм хăшпĕр кăлтăксене шута илмесен. Кунта халĕ пĕрер пăт ытла сĕт суса илеççĕ. Ку вăл районти чи пысăк кăтарту. Ĕнен сĕчĕ чĕлхи çинче тесе ахальтен каламан. “Акконд-агро” хăйĕн выльăхĕсене микроэлементсемпе пуянлатнă апат хутăшĕ çитерет, сĕт антаракан ĕнесене комбикорм чылай хушса парать.
Çак кунсенче Тушкилпе Тăрмăш чиркĕвĕсен пачăшки Сергий аттене илсе килсе комплекс витисене, территорири çуртсемпе объектсене çветить тутарчĕç. Сергий атте вĕсене таса шывпа сирпĕтсе тухрĕ. Специалистсем инкек-синкекрен сыхланма харпăр хăйĕн ĕç пÿлĕмне те питĕ çветить тутарас кăмăллăччĕ.
Церемони вăхăтĕнче комплексра “Акконд” кондитер фабрикин генеральнăй директорĕ, ЧР Патшалăх Канашĕн депутачĕ В. Иванов, район пуçлăхĕ Н. Иванов тата “Акконд-агро фирма” АУОн генеральнăй директорĕ В.Иванов та пулчĕç.
Источник: "Ял ĕçченĕ"