05 сентября 2008 г.
Районти тĕп больницăн хирурги уйрăмĕнче çăвĕпех тĕпрен юсас ĕçсем пычĕç. Авăн уйăхне кĕрес умĕн юсав вĕçленчĕ, сиплекенсемпе сипленекенсем хăйсен пирвайхи вырăнне таврăнчĕç. Халĕ хирурги уйрăмĕнче çутă та таса. Маччасемпе стенисене, чÿрече рамисемпе хашакисене, саккисене, ăшăтакан система пăрăхĕсене сăрланă, уйрăма пырса кĕрекен тата палатăсен алăкĕсене çĕннисемпе ылмаштарнă. Процедура кабинечĕсенче кафель плитисене çĕнетнĕ, урайне линолеум сарнă. Палатăсем унчченхинчен чылай çутăрах, хăтлăрах. Вĕсенче çĕнĕ краватьсем, тумбочкăсемпе пукансем вырнаçтарнă. Уйăрса панă укçа-тенкĕ çитнĕ таран матрассене те çĕнĕрен кÿрсе килнĕ. Халĕ уйрăмра ĕçлекенсем те, сывлăха юсакансем те хăйсене туса панă хăтлăхпа кăмăллă. Пур çĕрте те тасалăх, çĕнĕлĕх хуçаланать. Хальлĕхе радиопа телевизор кăна çитеймест, телефон çыхăнăвне йĕркелеймен.
Источник: "Ял ĕçченĕ"