02 сентября 2008 г.
Районти ял хуçалăх предприятийĕсем хушшинчи экономика ăмăртăвĕнче пĕрремĕш çур çулта «Дружба» ЯХПК çĕнтерÿçĕ пулса тăни çирĕпленчĕ нумаях пулмасть. Асăннă коллективри ĕçсене чылайранпа «ЧР ялхуçалăхĕн тава тивĕçлĕ ĕçченĕ» хисеплĕ ята илнĕ А.Салканов йĕркелесе пырать. Кунта, паллах, хуçалăхри тĕп бухгалтерăн Е.Васильеван тÿпи те сахал мар. Вунă çул тăрăшать иккен вăл шут ĕçĕнче. Вĕсенчен пиллĕкĕшне – Кĕршере тĕп бухгалтерта, ĕç укçи вăхăтра шутласа парать, ыйтупа пыракансемпе кăмăллă калаçать. «Питĕ тĕплĕ пурнăçлать хăйĕн тивĕçĕсене Елена Михайловна. Отчетсене аван тăвать, мухтава тивĕçлĕ хĕрарăм»,– тесе пĕлтерчĕ ял хуçалăх управленийĕн тĕп бухгалтерĕ Л.Берилло та.
Икĕ ывăл çитĕнтерет Елена Васильева. Асли, Михаил, шкултан вĕренсе тухнă. Дмитрий Мучарта пĕлÿ пухать.
Сăн ÿкерчĕкре: «Дружба» ЯХПКн тĕп бухгалтерĕ Е.Васильева.
Сăн ÿкерчĕкĕ авторăн.
Источник: "Ял ĕçченĕ"