Публикации » Чи пысăк продуктивлăх (Сельское хозяйство)

Вăхăт пĕр вырăнта тăмасть. Кĕçех акă кăçалхи ĕçĕн сакăр уйăхри пĕтĕмлетĕвĕсем те паллă пулаççĕ. Анчах ку вăхăт тĕлне çичĕ уйăхри даннăйсем те хăйсен пĕлтерĕшне çухатса ĕлкĕреймен-ха. Сăмах кунта “Дружба” ял хуçалăх кооперативĕнчи выльăх-чĕрлĕх пăхакансен ĕç кăтартăвĕсем пирки пырать. Асăннă хуçалăхра кăçал сĕтпе аш туса илесси малалла ÿснĕ. Тĕслĕхрен, кĕршесем кăçал сĕте пĕлтĕрхинчен 30 тоннăна яхăн нумайрах туса илнĕ, çичĕ уйăхра 389 тоннăна çитернĕ. Ÿсĕм 8 процент. Ĕнесен продуктивлăхĕ те çавăн чухлех хăпарнă: январь-июль уйăхĕсенче вăл вăтамран 3087 килогрампа танлашнă. Ку кăтарту районти ял хуçалăх предприятийĕсемпе фермер хуçалăхĕсем хушшинче чи пысăкки. Выльăхсене лайăх пăхни, кĕтĕве пайталлă çамрăк выльăхсемпе çĕнетсе пыни ферма ĕçченĕсене пысăк кăтартусем тума май парать.

В список