29 августа 2008 г.
31 çулхи Александр Федоров (йăх тымарĕсем тăрăх вăл пире ентеш те лекет, ашшĕ – Çĕнçырмаран), кикбоксинг енĕпе тĕнчен экс-чемпионĕ, икĕ çула яхăн тăхтав тунă хыççăн боксерсен професси рингне таврăнма шут тытнă. 53,5 килограмлă виçе категорийĕнче вăл тĕнче чемпионĕн ячĕшĕн кĕрешме хатĕрленесси пирки пĕлтернĕ. Çакă профессионал-боксерсен пĕрлĕхĕн 3 версийĕпе пулма пултарать: IBF, WBA, WBC.
–Ытти вак федерацисемпе пĕрлешÿсем тата ассоциацисем мана интереслентермеççĕ, – пĕлтернĕ республикăри ятарлă милици отрячĕн офицерĕ А.Федоров.
Бокс картлашкисем тăрăх пирĕн ентеш Кубăн паллă специалисчĕ Нельсон Лопес ертсе пынипе хăпарма тытăнасшăн. Асăннă тренер тĕнче чемпионĕсене темиçе те хатĕрленĕ. Сăмахран, çăмăл виçере Марат Мазимбаев (Казахстан). Паян пирĕн ентешĕн инçетри Колумбире вырăнти бокс “çăлтăрĕпе” Мануэль Эрнандеспа рейтингшăн ринга тухмалла. Район хаçатне вулакансен ячĕпе Александр Федорова ăнăçусем сунатпăр.
Источник: "Ял ĕçченĕ"