26 августа 2008 г.
Илемлĕ эс, тăван тавралăх,
Хирте тырпул саралнă чух.
Çуралнă чун юратнă ялăм
Çынсем ĕçе васканă чух.
Чăннипех те хитре пирĕн тавралăх. Уй-хирсенче кĕрхи ĕçсем пыраççĕ, комбайнсем тырă çапаççĕ, тракторсем çĕр хатĕрлеççĕ, утă-улăма преслаççĕ т.ыт.те.
Августăн 19-мĕшĕнче районти культура центрĕ çумĕнче йĕркеленĕ “Пучах” агитбригада çула тухрĕ. Ушкăнра 7 çын. Программа кĕске тата вăхăчĕ те сахал пулин те, артистсем пурне те тума ĕлкĕреççĕ. Хуçалăхсене çитсенех вырăнти пурнăçпа, ĕçпе паллашма васкатпăр. Камсем тăрăшуллăрах çак хĕрÿ те ответлă вăхăтра; Комбайнерсем, шоферсем, йĕтемре вăй хуракансем, шкул ачисем, пенсионерсем тата ытти те – вĕсене пурне те чысласа, ырласа юрă парнелетпĕр, чун апачĕпе тивĕçтерме тăрăшатпăр. Вăхăт сахаллине пăхмасăрах Раççей тата Чăваш президенчĕсен указĕсемпе те паллаштарма май тупатпăр.
Çынна пурнăçра нумаях та кирлĕ мар иккен. Пирĕн агитбригада концертне курсан, тав сăмахĕсем каласа пĕтереймеççĕ, чылай чухне вара тата килсе çÿрĕр-ха тесе ăсатаççĕ ял ĕçченĕсем.
Концерт программинче чăваш тата вырăс юррисем тата шÿтлĕ халапсем. Ертсе пыраканĕ – Ольга Сидорова. Юрлаканĕсем – Вера Абржина, Надя Иванова, Римма Маркова, Валя Александрова, баянпа хавхалантарса пыраканĕ – Владислав Степанов, балалайкăпа илемлетекенĕ – Александр Павлов. Агитбригада “Шимкусский”, “Красная Чувашия”, “Луч” тата “Новый путь” ЯХПКсенче пулчĕ. Пур хуçалăха та çитме тăрăшатпăр.
Источник: "Ял ĕçченĕ"