22 августа 2008 г.
Çынна аталанма, тавракурăма ÿстерме, пушă вăхăта интереслĕ ирттерме культура учрежденийĕсем пулăшаççĕ.
Культурăри çĕнĕлĕхсем пирки район администрацийĕн социаллă аталану, культурăпа спорт пайĕн пуçлăхĕ Геннадий Арсентьевич Масленников каласа пама хавас пулчĕ.
– Пурнăç пĕр вырăнта тăмасть. Улшăнусем ялан пулаççĕ. Эпир район çыннисем усăллă, ăслă-тăнлă, культурăллă пурнăçпа пурăнччăр, кăсăклануллă та тухăçлă, тулли вăйпа хавхаланса ĕçлеччĕр тесе тăрăшатпăр.
Район çыннисене пурĕ 26 клуб учрежденийĕ, 23 библиотека, икĕ халăх музейĕ, искусствăпа спорт шкулĕсем тивĕçтереççĕ. Вĕсенче пурĕ çĕре яхăн çын вăй хурать. Халăхăн пушă вăхăтне тĕллевлĕ, культурăлла ирттерессипе ĕçлеççĕ вĕсем.
Районта çулталăк тăршшĕпе нумай мероприяти иртет. Хĕле ăсатмалли уяв, “Мухтав саманчĕ” смотр-конкурс, театр кунĕ, агитбригадăсен конкурсĕ, Çĕнтерÿ уявĕ, çемье, Республика кунĕсем, Акатуй тата ытти уявсем ирттеретпĕр. Юрă-кĕвĕ конкурсĕсем те чылай пулаççĕ: “Уçă саслă ачалăх”, “Тăвай шевлисем” т.ыт.те. Районĕпе уявсене 10-12 фольклор коллективĕ хутшăнать. “Тăвай ен” халăх ансамблĕ кăçал Кемерево облаçĕнче гастрольте пулчĕ.
Культурăна ытларах тимлĕх уйăрма тытăннă. Клубсем çынсене, уйрăмах çамрăксене, хăйсем патне илĕртеççĕ. Вĕсене япăх телепередачăсем пăхнипе ăс-хакăлне сиенлĕ витĕм кÿрессинчен пăраççĕ. Районти культура çурчĕсенче дискотека ирттересси лайăхланса пырать, вĕсене эрнере икĕ кун йĕркелеççĕ. Çĕнĕ кĕвĕсемпе çамрăксем кăмăллă.
Тăван ен историне упрамалла пирĕн, хамăр çуралнă кĕтесе тата пуянрах, интереслĕрех, илемлĕрех тума тăрăшмалла. Çак тĕллевсене пурнăçлассишĕн тимлеççĕ те музейсемпе библиотекăсем. Викторинăсем, литература рингĕсем, вулав каçĕсем, вăйăсем йĕркелеççĕ.
Тăвайри тĕп библиотекăра ĕçлекен Нина Евгеньевна Соколова пĕлтернĕ тăрăх, кăçалхи пĕрремĕш çур çулта 10824 вулакана 174934 экземпляр кĕнеке панă. Районти вулавăшсенче пурĕ 38 çын ĕçлет, вĕсенчен 16-ĕшĕ аслă пĕлÿллĕ, 21-ĕшĕн – ятарлă вăтам пĕлÿ, 5-ĕшĕ ĕçленĕ хушăрах аслă шкулсенче вĕренет. Районта паянхи кунпа килĕшÿллĕ 18 тĕслĕх библиотеки. Унсăр пуçне кĕнеке паракан пунктсем пур: Амалăхра (Тĕмертен), Вăтаялĕнче (Кармалтан), Нÿшкассинче (Эльпуçĕнчен), Кушкăра (Енĕш Нăрвашран), Киччĕре (Кĕршерен).
Районта физкультурăпа спорта аталантарассине календарлă планпа килĕшÿллĕн туса пыма тăрăшатпăр. Волейболла выляса мала тухаççĕ, тĕрлĕ ăмăртусене хутшăнаççĕ пирĕн спортсменсем. Ветерансем республикăри футбол чемпионатĕнче малтисен йышĕнче. Йĕлтĕрçĕсем, кĕрешÿçĕсем, тхэквандистсем, шашистсемпе шахматистсем те çулленех хăйсен ăсталăхне кăтартаççĕ, çитĕнÿсем те тăваççĕ. Район пуçлăхĕ Н.Иванов хăй те ырă тĕслĕх кăтартать, тĕрлĕ ăмăртусене хутшăнма вăхăт тупать.
Хутмалли сезон çывхарать. 26 клуб учрежденийĕнчен 21-шне хутса ăшăтма палăртнă. Кармалта тата Йăнтăрчăра газ кĕртес енĕпе ĕçлеççĕ.
Малашне те çынсемшĕн ĕçлĕпĕр, çитменлĕхсене пĕтерсе пыма, тăвайсен культура шайне татах çĕклессипе хамăртан мĕн килнине пĕтĕмпех тума тăрăшăпăр.
Сăн ÿкерчĕкре: Г.Масленников ĕç вăхăтĕнче.
Сăн ÿкерчĕкĕ авторăн.
Источник: "Ял ĕçченĕ"