19 августа 2008 г.
Йăнтăрчăри “Луч” ял хуçалăх кооперативĕнче те, ытти çĕрти пекех, вырма-2008 пырать. Ку вăхăт тĕлне кунта кĕрхи тĕш тырă культурисене – вĕсем 140 гектар ытла пулнă – вырса çапса илнĕ. Хуçалăх ертÿçи Вадим Васильевич Филиппов каланă тăрăх, тухăç начар мар. Тырă уйĕ пурĕ 544 гектар йышăнать хуçалăхăн. Халĕ урпа çапаççĕ. Тырă пуссинче 2 комбайн. Пĕринпе Юрий Федоровпа Олег Егоров, тепринпе Анатолий Антоновпа Андрей Михайлов ĕçлеççĕ. Тăрăшаççĕ, терĕç, вĕсем пирки. Çĕнĕ тырра комбайнсем патĕнчен йĕтеме Валентин Павлов водитель турттарса тăрать. Йĕтемĕ хăй яра кунах тырă йышăнать тата ăна типтерлесе хатĕрлет. Хуçалăх ертÿçи кунти машиноведсемпе тырă сортлакансем пирки ырăпа асăнчĕ. Тыррине халăха та сутатпăр, терĕ. Кĕрхи тулла 6 тенкĕ те 20 пус çинчен сутаççĕ, иккĕмĕш сортли – 5-50, халĕ урпа та 6 тенкĕ çинчен сутма тытăнаççĕ. Сăмах майăн асăнсан, улăм сутнине те пĕлтĕмĕр – 1 рулонĕ – 300 килограмли – 300 тенкĕ. Улăмне леçсех парĕç. Уйра ĕçлекен механизаторсене вара кашнине 20-шер рулон утă панă, терĕç.
Кĕр аки вăхăчĕ те халь. Йăнтăрчăсем çĕр кăпкалатса хатĕрлеме чылай малтан тытăннă кăçал. Халĕ те ĕçлеççĕ ку тĕлĕшпе. Александр Борисов механизатор сухалать. Святослав Герасимов культивацире. Паян-ыран акма пуçласшăн.
Агрегатсене, уйри ĕçсене В.Ф.Табаев инженерпа Н.М.Сергеев агроном йĕркелесе тăраççĕ, терĕ В.В.Филиппов. Вăлах стажировкăри Валерий Никитин сварщик пирки те ырă каларĕ.
Источник: "Ял ĕçченĕ"