15 августа 2008 г.
Сарăллă-хĕрлĕллĕ икĕ хутлă çурт Тăвай ялĕн варринче инçетренех курăнса ларать. Ку вăл автостанци. Пирвай пĕр хутлă кăначчĕ автостанци çурчĕ. Малашлăха курса çуртăн тепĕр хутне çĕклерĕç. 2006 çулта реконструкци тунă хыççăн 26 суту-илÿ лавкки ĕçлеме пуçларĕ унта.
Ку вăл ертÿçĕ тăрăшмасăр пулман ĕнтĕ. Елена Александровна Фадеева 1992 çултанпах ĕçлет унта. Пирвай кассир пулнă, 1996 çултан автостанцие ертсе пыма шаннă ăна. Йĕркене тытса пырать, ĕçе тĕплĕ тăвать. Ĕçтешĕсемпе те кăмăллă вăл. Тамара Евдокимовапа Ирина Димитриева кассирсем халăха билетпа тивĕçтереççĕ. Ирина Александрова контролер ĕçне аван пурнăçласа пырать. Галина Федорова техслужащи вара тасалăхшăн куллен тăрăшать, шăлать, çăвать, тирпейлет.
Чылай çын çÿрет автобуспа е газельпе. Кăçалхи январь - июнь уйăхĕсенче 12960 рейс тунă, 144155 пассажира тивĕçтернĕ, 2690048 тенкĕ пырса кĕнĕ кассăна. Пĕлтĕр вара çак вăхăт тĕлне 14875 рейс (хушма рейссемпе) пулнă, 142976 пассажира турттарнă, 1788349 тенкĕ укçа пулнă. Кунне 11 маршрутпа 72 рейс туни, 1000 яхăн пассажир турттарни пирки пĕлтĕмĕр.
Сăмахран, Шупашкара 9 рейс (Канаш урлă - 4, Вăрмар урлă - 5) пулать вырсарникун, ытти кунсенче - 8. Çĕнĕрех хушăннă рейссем хушшинче Кармал, Нÿшкасси, Пуянкаси ялĕсене каяканнисене асăнса хăварма пулать.
Кашни кун ĕçе çÿрекенсем те чылай. Пĕрлехи проезднойпа 14 пин çынна яхăн çÿренĕ çур çул хушшинче.
Автовокзал – çын нумай пухăнакан вырăн, район “центрĕ”. Автобуссем кашни яла тенĕ пекех çитеççĕ халĕ, автопарк та чылай çĕнелчĕ.
Пассажирсем те кăмăллă.
Источник: "Ял ĕçченĕ"