08 августа 2008 г.
“Акконд-агро фирма” обществăн çур ĕмĕр ытла каялла тунă мастерской çурчĕ тулашĕнчен пăхма йăлт юхăнса çитнĕччĕ. Кăнтăр-хĕвеланăç енчи стенаран купаланă кирпĕчĕн пĕр сийĕ вырăн-вырăнпа ирĕлсе хăпса ÿкнĕччĕ, çурт тăрринчен шала çумăр та каятчĕ. Пĕр сăмахпа çурт илемсĕрленсе, хуçасăрла юхăнса ларатчĕ.
“Акконд-агро” иртнĕ уйăх вĕçĕнче мастерской çуртне юсас ĕçе пуçăнчĕ. Ăна “Веста” строительство фирми (директорĕ П.П. Иванов) пурнăçлать. Юрий Васильев бригадир ертсе пынипе строительсем çуртăн çивиттине цемент растворĕпе хытараççĕ, ун хыççăн битум сĕреççĕ, ун çине вара икĕ сий линокрим сараççĕ. Пĕр вăхăтрах облицовкăна çĕнетеççĕ, кирпĕч хурса штукатурка тăваççĕ, кайран сăрласшăн. Чÿрече рамисене те улăштарасшăн, вĕсенчен чылайăшĕ çĕрсе пĕтнĕ. Ĕçсен калăпăшĕ пĕчĕк мар, 2 пине яхăн тăваткал метр.
Юсав ĕçĕсене куллен 12 çамрăк хутшăнать. Вĕсен хушшинче аслăрах классенче вĕренекен шкул ачисем те пур. “Веста” фирма строителĕсем унччен “Акконд-агро фирмăн” ЛМУ çуртне юсаса панăччĕ.
Источник: "Ял ĕçченĕ"