05 августа 2008 г.
Иртнĕ кĕçнернире районти хуçалăхсенчен нумайăшĕ, çав шутра ферма хуçалăхĕсем те, вырма ĕçĕсене пуçăнчĕç. “Акконд-агро фирма” та кăнтăрларан комбайнсене Вăрманхĕррипе Мучар хушшинчи тулă пуссине кăларчĕ. Анана ытла çум курăклă теме çук. “Московская-39” элита вăрлăхпа тулă аван çитĕннĕ, тĕшши хытшăрнă (А.Михайлов агроном виçнĕ тăрăх нÿрĕклĕх 18;). Пĕрремĕш бункера В.Семенов комбайнерпа ăна пулăшакан И.Большов, Н.Поликарпов ЗИЛĕ çине пушатрĕç. Çав кун вĕсем 5 бункер çапса илчĕç. Вĕсем пĕр бункер пушаннă тĕле ана çине тепĕр “Дон–1500” çитсе кĕчĕ. Ун çинче М.Егоровпа унăн ывăлĕ Геннадий. Тепĕр “Донпа” Э.Никитинпа Е.Иванов выраççĕ. Механизаторсем пурте опытлă. Вячеслав Семенов, сăмахран, çак обществăра пиллĕкмĕш вырмана хутшăнать. Иртнĕ эрнере “Акконд-агро” пурĕ 93 гектар çинчи тулла çапса илнĕ, Н.Поликарпов, И.Сергеев, Н.Михайловпа Н.Степанов водительсем хăйсен автомашинисемпе 281 тонна тулă турттарнă. Вăтам тухăç гектартан 30 центнертан кая мар.
Çав кун юнашар тулă уйне С.Хумышев фермер хуç-алăхĕн СК-5 комбайнĕ те тухнăччĕ. В.Баталовпа ăна пулăшакан ывăлĕ Сергей турбина юрăхсăра тухнă пирки чарăннăччĕ.
–Иртнĕ вырсарнире Вăрманхĕрри пуссинче икĕ “Нива” каç пуличченех вырчĕç, эпир, чĕрĕрех тесе, тухаймарăмăр, – пăшăрханса каларĕç “Акконд-агро” механизаторĕсем. Тунтикун вара кунĕпех çумăр йăскарĕ.
А.Петров фермерăн та “Нива” комбайнĕ вырмана пуçăнчĕ, ĕнерхи кун тĕлне 20 тонна çапса тĕшĕлерĕ. Фермер каланă тăрăх, “Безенчукская-380” тулă аван тухăç парать.
Кĕрхи çанталăк майлă вăхăтăн кашни саманчĕпе усă курма хистет.
Сăн ÿкерчĕкре: В.Семенов комбайнерпа И.Большов помощник тата А.Михайлов агроном 1-мĕш бункера пушатнă вăхăтра.
Н.КРАСНОВ сăн ÿкерчĕкĕ.
Источник: "Ял ĕçченĕ"