22 июля 2008 г.
Пĕрлехи информаци кунĕнче районти ĕç коллективĕсенче тата çынсем пурăнакан вырăнсенче тĕл пулусем иртнĕ.
Çапла республика тĕп хулинчен килсе çитнĕ информаци ушкăнĕн ертÿçи, Чăваш Республикинчи çыхăну тата информатизаци енĕпе ĕçлекен патшалăх комитечĕн председателĕ С.А.Захаров район администрацийĕн пуçлăхĕн çумĕпе Г.Я.Гавриловпа пĕрле Тăрмăш ял тăрăхĕн активĕпе тата халăхпа тĕл пулнă. Çавăн пекех Ленин ячĕллĕ хуçалăхăн машина-трактор паркне çитсе унти механизаторсемпе те калаçнă. Çынсем фельдшерпа акушер пункчĕсенче аптека пункчĕсене хупнипе тухса тăнă йывăрлăхсем çинчен каласа панă, хăйсем харпăр хăй кил хуçалăхĕсенче туса илнĕ сĕте çав тери йÿнĕпе туяннипе питĕ кăмăлсăр пулнине палăртнă, Перекет банкĕн вклачĕсемпе паракан компенсацисем пирки хăйсен шухăшне пĕлтернĕ. Унчченхи проводлă радиона пăрахăçлани нумайăшне Мускавран, Шупашкарпа районтан паракан передачăсене итлессине пĕтерчĕ, тенĕ тĕл пулусене хутшăннисем. Пурăнакан вырăна, тавралăха таса тытмалли, йĕркелĕхе пăхăнмалли пирки те сăмах пынă. Республикăри малта пыракан ял тăрăхĕсен опычĕпе усă курса, ял урамĕсенче ăпăр-тапăра пухмашкăн урнăсем вырнаçтарма та вăхăт пулĕ.
Çыхăну тата информатизаци енĕпе ĕçлекен патшалăх комитечĕн председателĕн çумĕ А.Н.Сидоренко Эльпуç ял тăрăхĕн территорийĕнче пурăнакансемпе тĕл пулу ирттернĕ. Ял тăрăхĕн администрацийĕн çуртне çынсем унти пур ялсенчен те пынă. Республикăран килнĕ представитель информацийĕ хыççăн çынсем ыйтусем панă. Ял çыннисем харпăр хăй кил хуçалăхĕнчен сутакан сĕт хакĕ хăçан ÿсĕ; Сотовăй çыхăнăвăн шанчăклăхĕ пирки те ыйту хускатнă. Ялта пурăнакансенчен нумайăшĕ халĕ килтен Интернета кĕме пултараççĕ.
Енĕш Нăрваш ял тăрăхĕнче информаци кунĕнчи актуаллă ыйтусене Чăваш Республикин экологипе çут çанталăк ресурсĕсен министрĕн çумĕ В.И.Краснов ăнлантарса панă. Вăл район администрацийĕн экономикăпа пурлăх тата АПК аталанăвĕ управленийĕн начальникĕпе В.А. Ванеркепе тата вырăнти пуçлăхсемпе пĕрле механизациленĕ йĕтемре пулнă, пĕвесемпе кĕперсене çитсе курнă, вĕсене республикăри ытти çĕртипе танлаштарса кăтартнă.
Чăваш Республикинчи халăха ĕçе вырнаçтаракан патшалăх службин пуçлăхĕн çумĕ С.В.Иванова “Тăвай районĕнчи халăха ĕçе вырнаçтаракан центр” патшалăх учрежденийĕн коллективĕпе тĕл пулнă.
Пĕрлехи информаци кунĕнче хускатнă ыйтусене район пуçлăхĕ Н.И.Иванов патĕнче пĕтĕмлетнĕ.
Источник: "Ял ĕçченĕ"