00:00 02 февраля 2010 г.
Райцентрта уйăх çурăна яхăн тăсăлнă 2 çаврăмлă турнир иртнĕ эрнекун вĕçленчĕ. Никам та кĕтмен пуль вăл çапла кăткăс та çивĕч вĕçленессе. Юлашки турта 2 лидер тĕл пулчĕ. Пĕр енче – “Дорстройшăн” вылякан ăста çамрăксем: Алеша Михайлов, Гриша Алексеев, Вова Гаврилов, Леня Леонтьев, Дима Капитонов, Сергей Степанов. Тепĕр енче – шалти ĕçсен пайĕн сотрудникĕсем: Владимир Цыгановпа Александр Шарапов, Сергей Селивановпа Алексей Николаев, Тушкил çамрăкĕсем – Андрей Николаевпа Борис Максимов. Иçмасса ку хутĕнче Надя Шакрова та пулмарĕ. Вăйсем тан марри куç кĕретчĕ.
Пĕрремĕш партие “Дорстрой” çăмăллăнах выляса илчĕ. Зал кĕрлесе кăна тăчĕ. Г.Алексеевăн глушĕсем ăçта кирлĕ çавăнта ÿкрĕç. Анчах ытла ир милицие парăнтартăмăр терĕç пулас “Дорстрой” волейболисчĕсем. 2-мĕш партире, шут 5:4 чухне, А.Шарапов подачăпа кăна умлă-хыçлă 6 очко илсе шута 11:4 туса хума пултарчĕ. Унăн сиксе çапакан мечĕкĕсене никамах та тытаймарĕ. “Дорстрой” çухалса кайрĕ. Вĕсен глушĕсене В.Цыгановпа Андрей Николаев тата ыттисем блоксем лартса пÿлчĕç. “Дорстрой” психологи тĕлĕшĕнчен хуçăлчĕ, вăйă кайма пăрахрĕ. Милиционерсен вара шанчăк ÿссех пычĕ. Вĕсем 2-мĕш партие те, 3-мĕшне те выляса илчĕç. Пĕтĕм команда А.Шарапова пулăшса вылярĕ. Вăл малти линире те, варринче те, кайра та хăй лидер пулнине çирĕплетрĕ. “Дорстрой” 2-мĕш, вĕрентÿ пайĕ 3-мĕш, “Сетьгаз” 4-мĕш вырăнсем йышăнчĕç.
Чи пултаруллă командăсемпе тĕрлĕ номинацире уйрăм волейболистсене грамотăсемпе парнесем парса хавхалантарнă.
Турнир–марафон вĕçленчĕ, умра тата çивĕчрех, çÿллĕрех шайри турнир – В.Васильев кубокĕ.
И.ИВАНОВ.