00:00 01 декабря 2009 г.
Район администрацийĕнче ĕçлекен яваплă сотрудниксемпе тĕрлĕ служба ертÿçисен тунтикунхи планеркине район пуçлăхĕ Н.Иванов ирттерчĕ.
Шалти ĕçсен районти пайĕн начальникĕ В.Обаськин иртнĕ эрнере право йĕркине пăснă 29 çын тĕлĕшпе ĕç пуçарни, çав шутра ÿсĕрле руль умне ларнăшăн 8 водителе явап тыттарни çинчен пĕлтерчĕ. Милици уйрăмне тĕрлĕ штатсемпе комплектламаллине палăртрĕ.
Районти тĕп больницăн ача-пăча уйрăмĕнче юсав ĕçĕсем пыраççĕ. Район пуçлăхĕ вĕсене вăхăтра тата пахалăхлă вĕçлемелли çинчен аса илтерчĕ.
2009 çулта районта муниципаллă заказсене эффективлă вырнаçтармалла. Ку енĕпе район администрацийĕн экономика, пурлăх тата АПК аталанăвĕ управленийĕн çине тăрса ĕçлемелле.
Декабрĕн 24-мĕшĕнче районта куçман пурлăха сутмалли аукцион иртмелле.
Ял поселенийĕсенче налук пухассипе ытларах тимлемелле.
Кăçал, пĕлтĕрхипе танлаштарсан, район территорийĕнче ытларах вут-кăвар алхаснă. Ĕнер те Вăтаялĕнче пушар тухнă, вутра кил хуçи вилнĕ. Пушар хăрушсăрлăхĕн правилисене пурин те çирĕп пăхăнмалла.
Планеркăра район администрацийĕн пуçлăхĕн çумĕсем В.Шакровпа Г.Гаврилов, пай ертÿçисем В.Ванерке, А.Михайлов, А.Сергеев, С.Иванов тата ыттисем тухса калаçнă, тĕллевсене палăртнă.
В.ЧАЙКИН.