00:00 10 ноября 2009 г.
“Кооператор” магазинра шăпах çĕнĕ тавар пушатнăччĕ. “Ĕнер кăна Шупашкар хулине кайса килтĕмĕр. Стена çине çакмалли сехетсем, будильниксем, çатмасем, çÿç илемлетмелли фенсем, перчеткесем, колготкисем, ăшă трикосем, “Фанофати” фирмăн ăшă аттисем тата тем те илсе килтĕмĕр”, – тет потребобществăн суту-илÿ уйрăмĕн начальникĕ А.Сидорова. Александра Валериановна çынсем мĕнле тавар ыйтнипе, хăш магазинра мĕнле япала çуккипе интересленсех тăрать. Хăйех çула тухать водительпе, районта пурăнакансем валли пахалăхлă тавар илсе килме тăрăшать.
А.Сидорова списокра таварсен ячĕсене тупатчĕ, Р.Храмова сутуçă ятарлă приборпа хут çинчи хакĕсене çыпăçтарса тăратчĕ. Ĕç хăвăрт пулса пырать. Самантран Н.Игнатьева сутуçă килсе çитрĕ те çĕнĕ тавар сентре çинче вырăн тупрĕ.
В.ВАСИЛЬЕВ.