00:00 06 ноября 2009 г.
Тĕмер ялĕнче пушара хирĕç кĕрешекен уйрăм пост уçăлнă. Тăвайри пушар хуралĕн подразделенийĕнчен чылай аякра вырнаçнă май, Çĕнĕ Ишпуç (25 км), Чутей (19), Амалăх (20), Киччĕ (18), Кармал (18), Кĕрше (15), Тĕмер (11) ялĕсенче пурăнакансене хăйсен патĕнче пушар тухсан ăна сÿнтерме кашнинчех йывăр килнĕ. Пушар техникин малтанхи расчечĕсем те çул çывăх маррине пула пушар тухни çинчен пĕлтернĕ хыççăн вут-çулăма сÿнтерме 30–40 минутран çеç пырса çитме пултарнă. Çакă вăл кунашкал инкек-синкексенчен пысăк шар курасси, пурлăх пĕтесси, çынсен пурнăçĕ татăласси патне илсе çитернĕ.
Çавăнпа асăннă ялсенче пурăнакансемшĕн Тĕмер ялĕнче пушара хирĕç кĕрешекен уйрăм пост уçни питĕ пĕлтерĕшлĕ пулăм. Ку вăл район пуçлăхĕ Н.И. Иванов тăрăшнипе, Чăваш Республикин гражданла оборона тата чрезвычайлă лару-тăру ĕçĕсен Патшалăх комитечĕн председателĕ В.Н.Петьков пулăшнипе пулнă. Вĕсем пушар хăрушсăрлăхĕшĕн тимлесе ялан сыхă пулассине шанса тăнине палăртнă.
Тĕмер ялĕнчи уйрăм поста ГАЗ–66АЦ(30) пушар автомашини панă. Маларах “Победа” ЯХПКн пушар деповĕ пулнă çурта юсаса хатĕрленĕ.
Уйрăм пост уçнă ятпа пулса иртнĕ мероприятире асăннă ялсенче пурăнакансен ячĕпе Тĕмерти вăтам шкул директорĕн çумĕ Р.В.Якуркина, Тĕмер ялĕнчи ĕçпе вăрçă ветеранĕсен канашĕн председателĕ В.А.Петров, район депутачĕсен Пухăвĕн депутачĕ В.П.Козлова, Мучар ял поселенийĕн пуçлăхĕ О.П. Шакшина тав сăмахĕсем каланă.
В.ИСАЕВ.