09:29 14 октября 2014 г.
"Раççей - спорт патшалăхĕ" Пĕтĕм тĕнчери спорт форумĕн пĕрремĕш кунĕ хула çыннисем "çăлтăрпа" ирхи зарядка тунинчен пуçланнă.
Пĕрлехи зарядка ирттересси пирĕн республикăра йăлана кĕнĕ ĕнтĕ.
"Шупашкар паян - спорт хули, Раççей вара - спортăн мăнаçлă çĕр-шывĕ. ЧР тĕп хулине паян Раççей вăйлă спорт çĕр-шывĕ пултăр тесе нумай вăй хунă Олимп чемпионĕсем, паллă спортсменсем килнĕ. Спорт уявĕпе сире пурсăра та!" - тенĕ Дмитрий Губерниев сывă пурнăç йĕркине пăхăнакансене саламланă май.
Зарядкăна хутшăнакансене Чăваш Ен Пуçлăхĕ Михаил Игнатьев тата Шупашкар мэрĕ Леонид Черкесов ырă суннă.
-Юлашки вăхăтра эпир республикăра спорт юхăмĕ аталантăр тесе нумай вăй хуратпăр. Сире çак пĕлтерĕшлĕ ĕçе хутшăннăшăн тав тăватăп. Шанатăп: Олимп чемпионĕсемпе призерсем татах тухĕç Чăваш Енрен. Сывă пултăр спортпа туслă Раççей! Сывă пултăр спортпа туслă Чăваш Ен! - çĕкленỹллĕ кăмăлне пытарман Михаил Васильевич.
Сывă пурнăç йĕркине пăхăнакансем пĕрешкел шурă калпаксем тăхăннă, шурă шарфсем çыхнă. Чăн-чăн зарядка пулнă Шупашкарта. Куна зарядка тунинчен пуçламалла та, каçа уçăлса çỹресе ăсатмалла.
В.КУЗНЕЦОВ.
АУ «Редакция Янтиковской районной газеты «Ял ěçченě» («Сельский труженик») Мининформполитики Чувашии