Шупашкар хулине 550 çул çитнине халалласа хула администрацийĕ уявăн чи лайăх эмблеми-символне хатĕрлес енĕпе конкурс ирттерет. Унта дизайнерсем, архитекторсем, ÿнерçĕсем, творчествăлла аслă шкулсемпе училищĕсен студенчĕсем тата ытти уйрăм çынсем хутшăнма пултараççĕ.
Хулан 550 çулхи юбилейне сăнласа паракан эмблема-символăн проектне хатĕрлемелле. Унта хутшăнма кăмăл туни çинчен калакан заявка тата эскиз проекчĕ ярса памалла. Эскиз проектне çак япаласене кĕртме пулать:
–Шупашкар тематикин элеменчĕсем:
–тĕрлĕ материалсенчен тума пулакан символика формисем;
–кĕске текстсем (эмблема-символ текстсăр та пулма пултарать).
Эскиз проектĕнче эмблема-символăн хура-шурă тата тĕрлĕ тĕслĕ ÿкерчĕкĕ, ăнлантаракан текст пулмалла.
Пур графика материалне те АЗ форматпа, 50х50 сантиметрлă планшетпа çак адреспа ярса памалла: Шупашкар хули, Карл Маркс урамĕ, 36, 408 кабинет. Çавăн пекех kult@gcheb.cap.ru электрон почтăпа яма пулать. Кун пек чухне авторăн электрон адресне палăртма манмалла мар.
Ĕçсене пурне те сасăлав валли Шупашкар хулин официаллă сайтне (www.gcheb.cap.ru) вырнаçтараççĕ.
Конкурса 2013 çулхи сентябрĕн 30-мĕшĕнче пĕтĕмлетеççĕ. Çĕнтерÿçе 50000 тенкĕлĕх преми парса хавхалантараççĕ. Лайăх енчен палăрнă ĕçсене Раççейри дизайн журналĕсенче пичетлеме сĕнеççĕ.
Конкурс положенийĕпе Шупашкар хулин официаллă сайтĕнче паллашма пулать.