Новости » ТĔРЛĔ ХЫПАРСЕМ

Комбайн çинче – пĕрремĕш “пучах”

Н.В.Морякова хресчен фермер хуçалăхĕнче тĕш-тырă культурисем 800 гектар ытла йышăнаççĕ. Çурхи уй-хир ĕçĕсене чи пирвай вĕçлесе вырмана та малтисенчен пĕри тухрĕç кунти механизаторсем. Тăтăшах ăмăр çанталăк тăрать юлашки кунсенче. Анчах уяр кунăн кашни саманчĕпе туллин усă курма тăрăшаççĕ Алексей Ивановпа Владимир Борисов комбайнерсем. Виçĕм кун вĕсем кĕрхи тулă уйĕнче тăрăшрĕç. Ку вăхăт тĕлне экипаж 1500 центнер тырă çапса илнĕ. Тухăçĕ те япăх мар. Кăçалхи вырмара 100 тонна тырă çапса тĕшĕленĕ экипажа диплом парса хавхалантарма, комбайнĕ çине «пучах» çыпăçтарма пăхнă. Райадминистраци пуçлăхĕн пĕрремĕш çумĕ – АПК аталанăвĕпе экологи пайĕн пуçлăхĕ Валерий Чайкин тата пай секторĕн заведующийĕ Николай Краснов ĕç вăхăтĕнчех А.Иванов экипажне диплом панă. Уй-хир карапĕ çинче пĕрремĕш “пучах” ялкăшма пуçланă.

Р.ВАСИЛЬЕВА.

Ветерансене – тивĕçлĕ çăмăллăх

Раççей Федерацийĕн Президенчĕн тата Чăваш Республикин Пуçлăхĕн ветерансем çинчен калакан Указĕсене пурнăçа кĕртме пуçланăранпа “Ĕç ветеранĕ” тата “ЧР ĕç ветеранĕ” ятсене районта 1574 çын тивĕçлĕ пулнă. Тепĕр 54 гражданин документсем тăратнă.

“ЧР ĕç ветеранĕ” ята илнисем уйăхсерен 1026 тенкĕ хушма укçа тата телефон çыхăнăвĕпе усă курнă суммăн 50 процентне укçан компенсаци илеççĕ.

Çамрăксене пулăшаççĕ

“Ялăн 2013 çулчченхи социаллă аталанăвĕ” тата “2011–2015 çулсенчи пурăнмалли çурт-йĕр” федераллă тĕллевлĕ программăсемпе килĕшÿллĕн çамрăк çемьесене чылай пулăшаççĕ халь.

Çак кунсенче район администрацийĕн пуçлăхĕ В.Ванерке Тăвайра пурăнакан Наталия Ефремова учительницăна пурăнмалли çурт-йĕр тума укçа-тенкĕ илмелли свидетельство пачĕ. “Сирĕн кил-йышра савăнăçпа канлĕх хуçалантăр,” – терĕ ырă сунса Владимир Алексеевич. Свидетельство илме учительница пĕчĕк ывăлĕпе пынă. Вĕсен çемйи йыш татах хушăнасса кĕтет.

Çуртсене çĕнетсе

Кăçалхи ултă уйăх хушшинче нумай хваттерлĕ çуртсен е çĕнетсе тăррисене 3484 тăваткал метр чухлĕ, тĕтĕм тухмалли 10 çул, икĕ çуртăн фасачĕсене тата ыттине юсанă. Тăвай ялĕнче хăш-пĕр çуртсенчи хваттерсенче харпăр хăй газпа хутса ăшăтмалла тăвас ĕç малалла пырать.

А.АЛЕКСАНДРОВА.