Тунти кун район администрацийĕн пĕчĕк залĕнче ял тăрăхĕсен пуçлăхĕсен совечĕн кăçалхи вуннăмĕш анлă ларăвĕ иртнĕ. Унта ял тăрăхĕсен пуçлăхĕсемсĕр пуçне, район администрацийĕн структурăллă уйрăмĕсен, федераллă тата республикăри службăсен Тăвай енри пайĕсен, организацисемпе предприятисен ерÿçисем хутшăннă.
Муниципаллă çул-йĕре тăвасси тата юсасси, нумай ачаллă çемьесемпе тăлăх ачасен пурăнмалли условийĕсене лайăхлатас енĕпе тимлесси, нумай ачаллă çемьесене çĕр пайĕсем уйăрасси, муниципаллă учрежденисене хĕллехи тапхăрта ĕçлеме хатĕрлесси, ял тăрăхĕсенче вут-кăвар тухассине хирĕçлесе мероприятисем ирттересси, контейнерсенчи çÿп-çапа вăхăтра илсе тухасси – вăраха ямасăр татса памалли тĕллевсем.
Планеркăра район администрацийĕн пĕрремĕш çумĕ, АПК аталанăвĕпе экологи пайĕн начальникĕ В.Чайкин вырмари лару-тăрупа паллаштарнă. Вĕрентÿ пайĕн ертÿçи В.Шакров Чутей, Çĕнĕ Пуянкасси, Тăрмăш ялĕсенчи шкулсенче тĕплĕ юсав тăвасси мĕнле пыни çинчен каласа кăтартнă.
“ДЮСШ–ФСК “Аль” АУ директорĕ А.Кириллов сывлăхĕсене çирĕплетес ĕмĕтлĕ çынсене ирхине 8 сехет те 30 минутран пуçласа каçхине 20 сехет те 30 минутчен кĕтни пирки пĕлтернĕ. Иртнĕ эрнере бассейнра 305 çын шыва кĕрсе савăннă.
Çурла уйăхĕн пĕрремĕшĕнче районти хĕрарăмсен совечĕ Тăрмăш тата Енĕш Нăрваш ял тăрăхĕсене тухса лару ирттерет. “Раççейри пенсионерсен союзĕ” ОООн районти Совечĕн анлă канашлăвĕ ача-пăча пултарулăхне аталантармалли Тăвайри центрта авăнăн 2-мĕшĕнче пулать.
Полицин районти уйрăмĕн начальникĕ В.Обаськин, Тăвай енри надзор ĕçĕсен пайĕн инспекторĕ А.Фролов, Тăвайри больницăн тĕп врачĕ Н.Бурдасова, выльăх-чĕрлĕх чирĕсемпе кĕрешекен станци начальникĕ А.Шакин харпăр хăй коллективĕсенчи ĕçсемпе кĕскен паллаштарнă.
Г.ЕГОРОВА.