Район администрацийĕн пуçлăхĕн тивĕçĕсене пурнăçлакан Валерий Чайкин ертсе пынипе ĕнер район администрацийĕнче эрнелĕх планерка иртнĕ, унта малашлăх ĕçсене палăртнă.
Паянхи кун нумай хваттерлĕ çуртсенчи хваттерсене харпăр хăй ăшăтмалла тăвас ыйту актуаллă пулса тăрать. Район администрацийĕн пуçлăхĕн çумĕ – строительство, çул-йĕр тата пурăнмалли çурт-йĕрпе коммуналлă хуçалăх пайĕн начальникĕ Анатолий Алексеев пĕлтернĕ тăрăх, халĕ Тăвай ялĕнчи Ленин проспектĕнчи 52-мĕш номерлĕ çуртра газ оборудованийĕ вырнаçтараççĕ. 54-мĕш çуртра çак ĕçе вĕçленĕ. Ку эрнере 32-мĕш номерлĕ çуртра та монтаж ĕçĕсене пуçăнма палăртнă. Кусемсĕр пуçне районта нумай хваттерлĕ çуртсене тĕп юсав тăвассипе, котельнăйсемпе ăшăтмалли системăсене хĕллехи сезона хатĕрлессипе ĕçлеççĕ.
АПК аталанăвĕпе экологи пайĕн ял хуçалăх секторĕн заведующийĕ Николай Краснов уйри кĕрхи ĕçсемпе тата выльăх апачĕ хатĕрлесси епле пулса пынипе паллаштарнă.
Вĕренÿ пайĕн начальникĕ Владимир Шакров Тăрмăш, Чутейпе Çĕнĕ Пуянкасси шкулĕсенче тĕп юсав малалла пыни, вĕренÿ учрежденийĕсем çĕнĕ вĕренÿ çулне хатĕрленнине августăн 1-мĕшĕнчен тĕрĕслесе йышăнма тытăнассине каланă.
Финанс пайĕн начальникĕ Александр Сергеев республика бюджетĕнчен пырса кĕнĕ трансфертсем, экономикăпа пурлăх хутшăнăвĕсен пайĕн начальникĕ Любовь Берилло ку вăхăт тĕлне нумай ачаллă 55 çемье çĕр участокĕ илме черет тăни, 36 çемьене çĕр участокĕсемпе тивĕçтерни çинчен пĕлтернĕ.
Июлĕн 25-мĕшĕнче район администрацийĕ çумĕнчи административлă комисси ларăвĕ пулать.
Июлĕн 27-мĕшĕнче район администрацийĕн команди Чăваш Республикинчи патшалăх влаçĕпе вырăнти хăй тытăмлăх органĕсенче ĕçлекенсен физкультурăпа спортăн çуллахи ХII Спартакиадине хутшăнать.
Информацисене итленĕ хыççăн район администрацийĕн пуçлăхĕн тивĕçĕсене пурнăçлакан должноçри яваплă çынсене кун йĕркинчи çивĕч ыйтусемпе хушусем тунă.
Г.ЕГОРОВА.