Новости » Ресурс центрĕ уçăлнă

Утă уйăхĕн тăххăрмĕшĕнче Шупашкарти электроаппарат заводĕнче ресурс центрĕ уçăлнă. Унта Чăваш Республикин Пуçлăхĕ Михаил Игнатьев, “Сименс” компанин Раççейри, Тĕп Азири президенчĕ Дитрих Меллер тата ыттисем пулчĕç.

Заводăн генеральнăй директорĕ Александр Федотов кунта ăста специалистсем нумай çул ĕçленине пĕлтернĕ. “Центр малашне завода ресурспа пуянлатса хăватне ÿстерме, производствине тухăçлăрах аталантарма, çынсен пурнăçне лайăхлатма пулăшĕ”, – тенĕ вăл.

Ресурс центрĕ кадр çивĕчлĕхне сирес ĕçре питĕ пĕлтерĕшлĕ пулнине палăртнă Михаил Игнатьев.

–Чăваш Енĕн çĕр айĕнче хаклă пурлăх çук, анчах эпир ĕçчен те маттур çынсемпе пуян. Тĕллев – вĕсенчен профессие лайăх пĕлекен ăста специалистсем хатĕрлесси, квалификацие çулсерен малалла аталантарасси, – хăйĕн шухăшне пĕлтернĕ Республика Пуçлăхĕ. –Центрта студентсем ăс-тăна теорипе пуянлатаççĕ çеç мар, ăна производствăра çирĕплетме те пултараççĕ.

Чăваш Республики малалла çирĕппĕн утакан регион пулни пирки асăннă Дитрих Меллер. Çамрăксене инженер специальноçĕсем илме хавхалантарнине ырланă вăл. Çавăн пекех “Сименс” компани республикăри сывлăх сыхлавĕпе интересленни пирки каланă хăна. Медицинăра кирлĕ аппаратсене юсакан центр уçас, компани кăларакан оборудованисемпе ĕçлеме специалистсем хатĕрлес ĕмĕтлĕ иккен вĕсем.

А.НИКИТИНА хатĕрленĕ.