Кăçал Республика кунĕ Шупашкарти Хĕрлĕ площадьре массăллă зарядкăран пуçланчĕ.
Тĕрлĕ майкăсем, футболкăсем тăхăннă 3 пине яхăн спорта юратакан, сывă пурнăç йĕркине тытса пыракан харăс кар! тăрса тĕрлĕ хусканусем хаваспах турĕç. 30 минута пынă зарядкăна эпĕ те хутшăнтăм. Мускавран килнĕ Олег Тактаров артист тата спортсмен хăй ялан тăвакан тĕрлĕ упражненисене кăтартрĕ.
Ун хыççăн Шупашкар хули 500 çул ячĕллĕ паркра Пĕтĕм чăвашсен Акатуйĕ пуçланчĕ. Саламлă сăмахсем хыççăн тĕрлĕ регионсенчен килнĕ чăвашсем алла-аллăн тытăнса вăйă картине тăчĕç. Чăваш наци конгресĕн паллă çыннисем чÿк тунине пăхса килентĕмĕр. Чÿкленĕ хыççăн Мускав проспекчĕпе çуран утса Юрă лапамне çитрĕмĕр. Кунта 12 сехетре “Чăваш тĕнчин илемĕ – Акатуй” ятлă концерт пуçланчĕ. Ăна Мускав хулинчи ентешсем пуçларĕç. Вĕсем хыççăн Пушкăртран килнĕ хăнасем сценăна йышăнчĕç. Пушкăртра 120 пин чăваш пурăнать. Шупашкара Республика кунне уявлама 32 çын килнĕ.
“Раççей çăлкуçĕсем” ХХI Пĕтĕм Раççейри халăх творчествин фестивальне курма Шупашкар çыннисемпе хăнасем йышлăн пухăннă. Çак пысăк концерт кунĕпех пычĕ. Дагестанран килнĕ артистсем вара илемлĕ ташăсемпе килентерчĕç.
Хулан тĕрлĕ лапамĕсенче, керменсен умĕсенче кунĕпех юрă-кĕвĕ янăрарĕ. Мускавран, Питĕртен тата ытти хуласенчен килнĕ хăнасем Шупашкар тасалăхне ырларĕç, çитес çул та килме хавас пулнине каларĕç.
“Раççей алăстисем” курава 11-мĕш хут ирттереççĕ. Кăçал 14 регионтан тĕрлĕ япала нумай илсе килнĕ. Çыхса тунă сĕтел-пукан та пур. Хурăн хуппине якатса çырнă ĕлĕкхи çыру та.
Фейерверксен Пĕтĕм тĕнчери VI фестивалĕ – хăйне евĕр асамлăх. Мĕнлисене кăна курмастăн! Вĕсене хаклама жюри йĕркеленĕ. Кашни çĕр-шывран, регионран илсе килнĕ фейерверксене музыка çемĕпе илемлетнĕ.
Çĕртме уйăхĕн 24-мĕшĕнче уяв тăван районта та пулнă. Хамăн пĕлĕшсем ăна лайăх йĕркелесе ирттернине пĕлтерчĕç. Куншăн эпĕ хаваслантăм.
Павел ФЕДОРОВ.