Сире Республика кунĕ ячĕпе чун-чĕререн саламлатăп!
Çак паллă кун Чăваш Ене – тĕрлĕ наци йышĕнчи тата тĕрлĕ тĕне ĕненекен, мĕн авалтан туслăн та килĕштерсе пурăнакан çĕр пин тĕрĕ тата çĕр пин юрă çĕр-шывне чунтан юратакан мĕн пур çыншăн уйрăмах çывăх.
Пирĕн республика, Раççей Федерацийĕнчи лайăх аталанакан регионсен йышĕнче тивĕçлĕ вырăнта тăнă май, аталанупа прогресс çулĕпе шанчăклăн тата вăхăтпа тан утать.
Промышленноç, ял хуçалăхĕ тата строительство индустрийĕ çĕнелеççĕ, пĕчĕк тата вăтам бизнеса патшалăх кÿрекен пулăшу палăрмаллах ÿснĕ, граждансене социаллă пулăшупа тивĕçтерессин шайĕ пысăкланать, медицина тата вĕренÿ енĕпе паракан пулăшу ĕçĕсен пахалăхĕпе юрăхлăхĕ куç умĕнчех лайăхланаççĕ.
Çамрăк çемьесене пулăшасси, çавăн пекех ача амăшĕсене тата ачалăха хÿтĕлесси çине уйрăмах тимлĕн пăхатпăр. Спорта тата сывă пурнăç йĕркине халăх хушшинче пропагандăлас ĕç ăнăçлăн пурнăçланать. Республикăра пурăнакан кашни виççĕмĕш çын физкультурăпа туслă тата хăйĕн сывлăхне вăл пулăшнипе çирĕплетет. Йышăннă мерăсене пула пĕлтĕр Чăваш Енре 20 çул хушшинче пуçласа халăх хăй халлĕн ÿснине шута илнĕ.
Чăваш Ен халăхĕ тăван çĕре чунтан юратать, унăн нумай ĕмĕре тăсăлакан историйĕпе мăнаçланать, хăйĕн наци йăли-йĕркине тата мăн аслашшĕсен пуян ăс-хакăл еткерне типтерлĕн сыхласа упрать. Республикăра пурăнакансен ĕçченлĕхĕ, пысăк ăсĕ тата çÿллĕ шайри культури влаç органĕсен тухăçлă ĕçĕпе пĕрлешсе обществăри çирĕплĕхе малалла та сыхласа упрама, экономикăна аталантарса чечеклентерме, граждансен социаллă хÿтлĕхне çирĕплетме пулăшасси пирки иккĕленместĕп.
Пĕтĕм кăмăлтан çирĕп сывлăх, ырă шанăç, юратупа телей тата ырлăх сунатăп!
Чăваш Республикин Пуçлăхĕ Михаил ИГНАТЬЕВ.