Çу уйăхĕн 14-мĕшĕнче Пенза облаçĕнчи Константиновка ялĕ çывăхĕнче автотранспорт хатĕрĕсем çапăннипе хăрушă инкек пулнă. Микроавтобусри 19 çынран вуннăшĕ вырăнтах вилнĕ, тăххăрăшĕ аманнă. Вĕсем пурте – Чăваш Енрен, Сочирен Олимп объекчĕсем хăпартнă çĕртен ĕçлесе таврăнакансем пулнă.
Автоаварире вилнисенчен пиллĕкĕшĕ – Вăрмар районĕнчи Аслă Чак ял тăрăхĕнчен, тепĕр иккĕшĕ – Пысăк Енкасси, тата тепри Энĕшпуç ял тăрăхĕсенчен. Микроавтобус водителĕ – Вăрмартан.
Хăрушă инкекре пирĕн районти Сăхăтпуç ялĕнчи 47 çулхи Владимир Геннадьевич Птицынăн та пурнăçĕ татăлнă. Унăн ентешĕ В.И. Трофимов суранланнă.
Чăваш Ен Пуçлăхĕ Михаил Игнатьев Пенза облаçĕнче пулнă инкекре вилнисен тăванĕсемпе пĕрле хурланни çинчен пĕлтернĕ. Республикăн Министрсен Кабинечĕ автоаварире инкек тÿснисене тата вĕсен çемйисене тивĕçлĕ пулăшу панă. Шар курнисен çывăх çыннисемпе пĕрле куляннине палăртакан телеграммăсем Республика Пуçлăхĕ ячĕпе Россотрудничество ертÿçинчен Константин Косачевран, Раççей Патшалăх Думин Вĕренÿ комитечĕн председателĕнчен Алена Аршиноваран, Пенза облаçĕн кĕпĕрнаттăрĕнчен Василий Бочкаревран тата ыттисенчен килнĕ.
Ĕнер тăванĕсем, ял-йыш Владимир Геннадьевич Птицына юлашки çула чысласа ăсатнă. Унта район администрацийĕн ертÿçи В.Ванерке, унăн пĕрремĕш çумĕ, экологи тата АПК пайĕн пуçлăхĕ В.Чайкин, район администрацийĕн ятарлă программăсен секторĕн заведующийĕ В.Исаев, Тушкил ял тăрăхĕн пуçлăхĕ П.Захаров хутшăннă, вилнĕ çыннăн çывăх çыннисемпе, тăванĕсемпе пĕрле чĕререн хурланнине палăртнă, вил тăпри çине чечек кăшăлĕ хунă. Район администрацийĕ инкек тÿснĕ çемьене укçа-тенкĕ парса пулăшнă.