Новости » УЯВ ЯЧĔПЕ!

 Хисеплĕ ентешĕмĕрсем!

Сире ырă та çутă уявпа – Пĕтĕм тĕнчери çемье кунĕпе саламлатăп!

Çемье – çынна шăпа парнелекен чи хаклă пуянлăх. Хăйне ăнланакан, йывăр самантра пулăшма хатĕр çывăх çынсем çумра пулнă чухне унăн вăй-халĕ палăрмаллах ÿссе хăватланать.

Çемье – обществăн пахаран та паха пайĕ, патшалăх тĕрекĕ, культурăпа халăх йăли-йĕркин шанчăклă управçи. Тăван çĕр-шыва юратма тата хамăр таврари çынсене хисеплеме пиртен кашниех çемьере хăнăхса ÿсет.

Чăваш Республикинче çемье хаклăхĕсене çирĕплетме пулăшасси политикăн тĕп çул-йĕрĕсенчен пĕри пулса тăрать. Патшалăх паракан тĕрлĕ енлĕ пулăшăва пула çамрăк çемьесен пурăнмалли условийĕсене лайăхлатмалли майсем йĕркелеççĕ. Ача амăшĕсене тата ачалăха хÿтĕлемелли мерăсем те çулсерен вăйланса пыраççĕ. 2012 çулхи кăрлач уйăхĕн 1-мĕшĕнчен пуçласа виççĕмĕш ача е ун хыççăнхи ачасем çуралнă çемьесене республикăн амăшĕн капиталĕпе тивĕçтеретпĕр. 2013 çулхи кăрлач уйăхĕн 1-мĕшĕнчен пуçласа виççĕмĕш ача е ун хыççăнхи ачасем çуралнă çемьесем ача виçĕ çула çитиччен кашни уйăхра паракан тÿлеве илсе тăраççĕ.

Паянхи уяв вăл – тăван кил-йыша юрату парнелеме, уншăн тăрăшма, хамăра тĕрлĕ инкек-синкекрен сыхласа ырăлăх ытамĕнче пăхса çитĕнтернĕшĕн атте-аннемĕре пĕтĕм чунтан тав тума сăлтав туса паракан тепĕр лайăх май та.

Çывăх çыннăрсемпе хăвăр хушăри ăшă хутшăнусене сыхласа упрăр, пĕр-пĕрне юратăр, ăнланма тăрăшăр, ятлаçасран асăрханăр. Сирĕн çемйĕрте яланах тăнăçлăхпа юрату тата çураçу хуçалантăр!

Чăваш Республикин Пуçлăхĕ М.ИГНАТЬЕВ.