Новости » Аслă Çĕнтерÿ уявĕпе!

 Чăваш Республикин хисеплĕ çыннисем!

Тăван çĕр-шывăн Аслă вăрçин хаклă ветеранĕсемпе тыл ĕçченĕсем!

Сире Çĕнтерÿ кунĕ ячĕпе пĕтĕм чунтан саламлатăп!

Çак уяв пирĕншĕн пуриншĕн те уйрăмах çывăх. Вăл халăх пĕрлĕхне, хăюлăхпа паттăрлăха тата Тăван çĕр-шыва чунтан юратнине сăнарлакан çутăран та çутă символ пулса тăрать. Фашистла Германие çĕнтерессине çывхартас ĕçе миллионшар çын вăй çитнĕ таран тÿпе хывнă, вĕсенчен нумайăшĕ çĕр-шывăмăрăн ирĕклĕхĕпе никама пăхăнманлăхне сыхласа хăварассишĕн пурнăçне панă.

Чăваш Ен çыннисем Тăван çĕр-шыва мĕн пур фронтра паттăррăн хÿтĕленĕ. Тылра вăйран кайса ĕçленĕ – ачисемпе мăнукĕсен пуласлăхĕшĕн паттăрлăх кăтартнă. Пирĕн халăхăмăрăн 208 пин ытла харсăр ывăлĕпе хĕрĕ фронта тухса кайнă. Çĕнтерĕве çĕнсе илме пĕрре те çăмăл пулман – çапăçу хирĕнчен пурте каялла таврăнайман. Вăрçă хыççăн Чăваш Республики арканнă хуласемпе ялсене юсаса çĕклеме пĕтĕм çĕр-шывпа пĕрле хастаррăн хутшăннă. Пирĕн атте-анне, асатте-асанне, кукаçи-кукамай килес ăрусем телейпе пурăнччăр тесе экономикăна кĕске вăхăтра ура çине тăратнă.

Кашни çулах Майăн 9-мĕшĕнче эпир çĕр-шывăмăршăн питех те йывăр килнĕ çулсене тивĕçлипе тÿссе ирттернĕ тата пире çĕнтерÿ парнеленĕ паттăрсене чыслатпăр. Тăван çĕр-шывăн Аслă вăрçин хаклă ветеранĕсемпе тыл ĕçченĕсем! Паттăрлăхăрпа хăюлăхăршăн пурсăра та çĕре çити тайма пуç! Эсир – халăхăн тĕп хăвачĕ!

Сире вăрăм ĕмĕрлĕ кун-çул, çĕкленÿллĕ кăмăл-туйăм, ырлăхпа телей сунатăп!

Чăваш Республикин Пуçлăхĕ М.ИГНАТЬЕВ.