Новости » Анлă ларура

   2013 çулхи майăн 6-мĕшĕнче ял тăрăхĕсен пуçлăхĕсен район администрацийĕн пуçлăхĕ çумĕнчи Канашĕн кăçалхи пиллĕкмĕш анлă ларăвĕ пулса иртнĕ.

Унта ял тăрăхĕсен пуçлăхĕсем, район администрацийĕн структура подразделенийĕсен, федераллă тата республикăри ĕç тăвакан влаç органĕсен районти уйрăмĕсен тата райцентрти предприятисемпе организацисен ертÿçисем хутшăннă. Апрельти ĕç итогĕсене пĕтĕмлетнипе пĕрлех ларăва ертсе пынă район администрацийĕн пуçлăхĕ Владимир Ванерке çывăх малашлăх валли тĕллевсем лартнă.

Тĕп ыйтусенчен пĕри – çурхи уй-хир ĕçĕсене вăраха ямасăр ирттересси. Администраци пуçлăхĕн пĕрремĕш çумĕ – АПК аталанăвĕпе экологи пайĕн начальникĕ Валерий Чайкин районта çурхи уй-хир ĕçĕсем мĕнле пыни çинчен каласа панă. Хальлĕхе районта 4710 гектар ытларах пĕрчĕллĕ тата пăрçа йышши тĕш тырă культурисем, 326 гектар пĕр тата 245 гектар нумай çул ÿсекен курăксем акса хăварнă.

Владимир Алексеевич ял тăрăхĕсен пуçлăхĕсене харпăр хăй ял тăрăхĕсен территорийĕсенче вырнаçнă ял хуçалăх предприятийĕсемпе хресчен фермер хуçалăхĕсен ертÿçисене çуракине вăраха ямасăр тата пахалăхлă ирттермешкĕн май килнĕ таран пулăшма ыйтнă.

Май уйăхĕнчи тĕп задачăсен шутĕнче çавăн пекех – урамсене çутатассине йĕркелесе тăрасси, контейнерсенчи тата ытти çĕрти çÿп-çапа илсе тухасси, Аслă Отечествăлла вăрçăра Çĕнтерÿ тунăранпа 68 çул çитнине тата Республика кунне Тăвай районĕнче уявлассине лайăх хатĕрленсе ирттересси. Ял тăрăхĕсен пуçлăхĕсене тивĕçлĕ ĕçсем туса ирттерме хушнă.

Ларура çавăн пекех районти право сыхлавĕ, надзор ĕçĕ тата сывлăх сыхлавĕ енĕпе информацисем итленĕ, ытти хăш-пĕр актуаллă ыйтусене сÿтсе явнă.

Г.ЕГОРОВА.