Новости » Ĕçсем хушăнсах пыраççĕ

  Ĕнер район администрацийĕнче администраци пуçлăхĕ Владимир Ванерке ертсе пынипе эрнелĕх ĕç планерки иртнĕ, унта умĕн тунă ĕçсене пĕтĕмлетсе малашлăх тĕллевсене палăртнă. Çапла ку эрнере хăш-пĕр паллă мероприятисем иртмелле. Тĕслĕхрен, апрелĕн 25-мĕшĕнче районти тĕп библиотекăра “Чĕлхем эс чĕрĕлĕх çăлкуçĕ” краеведени пĕлĕвĕн кунĕ иртĕ. Апрелĕн 26-мĕшĕнче – районти депутатсен Пухăвĕн черетлĕ ларăвĕ. Çак кунах районти культурăпа кану центрĕнче патриотла юрăсен “Пурăн тата асра тыт” фестивалĕ пулать.

Планеркăра çурхи уй-хир ĕçĕсене ирттересси тĕп ыйтусенчен пĕри пулнă. Районти хăш-пĕр хуçалăхсенче уй-хир ĕçĕсем пыраççĕ ĕнтĕ.

Тавралăха тирпей-илем кĕртес, республика кунне районта уявлас ыйтусем те малта тăраççĕ. Çакăн пирки район администрацийĕн пуçлăхĕ тепĕр хут аса илтернĕ, хушусем панă.

(Хамăр инф.).