00:00 19 марта 2013 г.
Ĕнерхи планеркăра район администрацийĕн пуçлăхĕ Владимир Ванерке умĕнхи эрнери ĕçсене пĕтĕм-летнĕ, малашлăх задачăсене палăртнă.
Ку эрнере районта пĕлтерĕшлĕ хăш-пĕр мероприятисем иртеççĕ. Вĕсенчен пĕри – район депутачĕсен Пухăвĕн ларăвĕ. Депутатсем унта мартăн 19-мĕшĕнче пухăнаççĕ. Вĕсем “Тăвай районĕн депутачĕсен Пухăвĕн “Тăвай районĕн 2013 çулхи тата 2014–2015 çулсенчи планлă тапхăрти бюджечĕ çинчен” йышăнăвне улшăнусем кĕртесси çинчен”, Чăваш Республикин патшалăх наградисене илме тăратасси, район депутачĕсен Пухăвĕн 2008 çулхи февралĕн 15-мĕшĕнчи 20"12 номерлĕ “Муниципаллă службăн вакантлă вырăнне йышăнасси çинчен” йышăнăва улшăнусем кĕртесси çинчен ыйтусене сÿтсе явма палăртаççĕ.
Мартăн 20-мĕшĕнче районта, пĕтĕм республикăри пекех, Пĕрлехи информаци кунĕ иртет. Унăн тĕп темисем – влаçăн ĕç тăвакан тата вырăнти хăй тытăмлăх органĕсен çурхи уй-хир ĕçĕсене хатĕрленсе ирттерес задачисем, Раççей Федерацийĕн пенси тытăмĕн 2030 çулчченхи вăрăм сроклă стратегийĕ, халăха 2013 çулта паракан коммуналлă услугăсен тарифĕсем. Информаци ушкăнĕсем вырăна тухса халăхпа тĕл пулĕç тата 13 сехетре райадминистраци çуртĕнче çынсене харпăр хăй ыйтăвĕсемпе йышăнĕç.
Вăраха ямасăр татса памалли тĕп ĕçсен шутĕнче – çурхи шыв-шуртан сыхланмалли мероприятисене пурнăçласси, физически лицосенчен тÿлев срокĕ иртнĕ пурлăхпа çĕр налукĕсене пухасси, çурхи уй-хир ĕçĕсене хатĕрленмелли мероприятисем, йышăнман çĕрсене регистрацилес ĕçе хăвăртлатасси, пурлăхпа усă курнин эффективлăхне ÿстересси. Администрацин структура подразделенийĕсен ертÿçисене çак ĕçсене пурнăçлама мерăсем йышăнма хушнă.
Администраци пуçлăхĕн пĕрремĕш çумĕ – АПК аталанăвĕпе экологи пайĕн начальникĕ Валерий Чайкин ял хуçалăх предприятийĕсенче отчетпа суйлав пухăвĕсем иртни, çак эрнере вĕсем хресчен фермер хуçалăхĕсенче те малалла пуласси çинчен пĕлтернĕ.
Яланхи пекех, ятарлă службăсен иртнĕ эрнери ĕçĕ-хĕлĕ пирки оперативлă информацисем итленĕ.
Планеркăра район аталанăвĕн ытти хăш-пĕр ыйтăвĕсене те сÿтсе явнă.
(Хамăр инф.).