00:00 18 января 2013 г.
Кăрлач уйăхĕн 15-мĕшĕнче Çĕрпÿ районĕнчи Туçи ялĕнче Октябрь урамĕнчи 2-мĕш номерлĕ, 3 хутлă çуртра ирхине газ сирпĕннĕрен взрыв пулнă. Оперативлă ушкăнсем тÿрех инкек пулнă вырăна васканă. Шел, икĕ çын вилнĕ. Синкере лекнисене пулăшма кÿршĕ субъектсенчи ятарлă службăсем килсе çитнĕ. Çав кунах Чăваш Ен Пуçлăхĕ Михаил Игнатьев Туçи ялĕнче пулнă, газ сирпĕнсе шар кăтартнă çынсене пулăшассипе çыхăннă ыйтусемпе канашлу ирттернĕ.
Министрсен Кабинечĕн Председателĕ Иван Моторин каланă тăрăх, ишĕлнĕ çурт вырăнне çĕннине хута янине сăнаса тăракан ĕç ушкăнĕ йĕркелеме пуçланă. Транспорт тата çул-йĕр хуçалăхĕн министрĕ Михаил Янковский сиенленмен хваттерсен хуçисем кун каçиччен хăйсен япалисене, документсене кĕрсе илме пултарнине пĕлтернĕ. Сывлăх сыхлавĕн министрĕ Алла Самойлова больницăна лекнĕ икĕ çын хăйсене аван туйнине, вĕсене сиплемелли хатĕрсем, эмелсем çителĕклине палăртнă.
Республика пуçлăхĕ мĕн пур службăна хăвăрт тата тухăçлă ĕçленĕшĕн тав тунă. “Сиплессине, шар курнисене вырнаçтарассине, психологи пулăшăвĕ парассине, вĕри апатпа тивĕçтерессине вăхăтра тата туллин пурнăçланă. Раççей Президенчĕн федерацин Атăлçи округĕнчи полномочиллĕ представительне Михаил Бабича, РФ Чрезвычайлă лару-тăру министрне Владимир Пучкова икĕ хутчен лару-тăрупа паллаштартăм. Пирĕн ĕç-хĕле федерацин влаç органĕсем пысăк хак пачĕç”, – тенĕ Михаил Игнатьев.
Чăваш Ен Пуçлăхĕ федераци бюджетĕнчен финанс пулăшăвĕ илме РФ Регионсен аталанăвĕн министерствине тата МЧСа заявка тăратнине пĕлтернĕ. Малтан шутласа палăртнă тăрăх инкеке сирме 60 млн. тенкĕ кирлĕ. Республикăра шар курнисем валли япаласем пухма пуçланă. “Çынсене нихăçан та инкекре пĕччен хăварман, хăвармăпăр та”, – тенĕ юлашкинчен Михаил Игнатьев.
В.НИКОЛАЕВА.