00:00 28 декабря 2012 г.
2013 çулта Республика кунне Тăвай районĕнче ирттересси çинчен ЧР Пуçлăхĕ М.Игнатьев раштавăн 1-мĕшĕнче Указ кăларнă.
Уява хатĕрленсе ирттерекен районти оргкомитетăн черетлĕ ларăвĕ пулчĕ. Ăна унăн председателĕ, район администрацийĕн пуçлăхĕ Владимир Ванерке ертсе пычĕ. Чăн та, ĕçлемелли пайтах. Тăвайри административлă çуртсене тĕпрен юсама, вĕсен тавра тирпей-илем кĕртме пăхнă. Уяв мероприятийĕсем июнь уйăхĕнче пулаççĕ, апла пулсан хатĕрленÿ тапхăрĕнче мĕн-мĕн тумаллине халь тĕплĕн палăртмалла.
Уяв, тĕпрен илсен, район центрĕнче иртет. Нумай хăна, район тулашĕнче пурăнакан хамăрăн ентешсем килсе курма кăмăл тăвĕç. Вĕсен умĕнче Тăвай ене тивĕçлипе кăтартмалла. Тата тепĕр енчен илсен, праçнике хатĕрленсе пысăк калăпăшлă ĕçсем туни хамăршăнах лайăх.
Халĕ уяв логотипне туса хатĕрлессипе районта конкурс пырать. Район администрацийĕн сайчĕ çинче баннер уçнă.
Паян вара район хаçатĕнче çĕнĕ рубрика уçрăмăр.
Район çыннисене, унăн тулашĕнче пурăнакансене хăйсен шухăш-кăмăлне çырса пĕлтерме, усăллă канашсем пама ыйтатпăр.
В.ЧАЙКИН.