00:00 18 сентября 2012 г.
Район администрацийĕн пуçлăхĕ Ю.Васильев ĕнерхи анлă планеркăна ырă хыпартан – Тăвай районĕ республикăри муниципаллă районсем хушшинче вырăнти хăй тытăмлăх органĕсен ĕçĕн эффективлăхне 2011 çулшăн хак панин результачĕсем тăрăх III вырăн йышăннинчен – пуçланă. Юрий Егорович ял тăрăхĕсен пуçлăхĕсене, предприятисемпе организацисен тата учрежденисен ертÿçисене, районта пурăнакан пур çынна та витĕмлĕ ĕçшĕн тав тунă, пĕрлехи вăйпа нумай ырă улшăну тума май пуррине палăртнă.
Район администрацийĕн пуçлăхĕ çак эрнере тата малашлăхра пурнăçламалли уçăмлă тĕллевсем лартнă.
Сентябрĕн 23-мĕшĕнче “Наци кросĕ–2012” ăмăртусен районти тапхăрĕ иртет. Массăллă чупăва пурне те хутшăнтарма тăрăшмалла. Пĕрлех тĕрлĕ ÿсĕм çулĕсенчи ушкăнсенче команда эстафети иртĕ.
Октябрĕн 1-мĕшĕнче – Ватă çынсен кунĕ. Тĕрлĕ харпăрлăх формиллĕ предприятисен ертÿçисен ĕç ветеранĕсемпе тĕл пулусем йĕркелемелле, ĕçре хисеп çĕнсе илнĕ çынсене чысламалла, район шайĕнче те мероприятисем йĕркелемелле.
Октябрĕн 1-мĕшĕнчен хутмалли сезон пуçланать. Çавăнпа та ăшăпа тивĕçтерекен котельнăйсемпе трассăсене юсассине çак кунсенчех вĕçлемелле.
Урамсемпе лапамсене, территорие тирпей-илем кĕртес ĕçсем çинчен манма юрамасть. Халĕ тăрăшни çуркунне харама каймĕ, ун чухне ĕç сахалланĕ. Харпăр ирĕкĕпе тунă çÿп-çап тăкмалли вырăнсене çывăх вăхăтрах пĕтермелле.
Урамсене каçхине çутăпа тивĕçтересси, шыв башнисене ăшă тытмалла тăвасси, хĕллехи вăхăтра урамсене юртан тасатса тăрасси – ял тăрăхĕсен пуçлăхĕсен умĕнчи куллен туса пымалли ĕçсем.
Районти чылай шкул çурчĕ – 20–30 çул каялла тунăскерсем. Вĕсене комисси пухсах пăхса çаврăнмалла: юрăхлă-и усă курма е çук.
Паянхи куна “Новый путь”, “Красная Чувашия” ЯХПКсенче тĕш-тырă культурисене пухса кĕртессине кăшт вĕçлеймен. Çĕр улми пухса кĕртмелли лаптăк тепĕр 300 га ытла. Кĕрхи кашни уяр сехетпе туллин усă курма тăрăшмалла, ĕçлеме пултаракан кашни çынна явăçтармалла.
Октябрĕн 14-мĕшĕнче Элпуç (4-мĕш округ) тата Тăрмăш (2-мĕш округ) ял тăрăхĕсенче депутат суйламалли хушма суйлав. Кандидатсене регистрациленĕ, участокри суйлав комиссийĕсене йĕркеленĕ ĕнтĕ. Пĕтĕм ĕç планпа килĕшÿллĕн пулса пырать.
Ларура çавăн пекех район аталанăвĕн ытти пĕлтерĕшлĕ ыйтăвĕсене те сÿтсе явнă.
В.ЧАЙКИН.