00:00 06 июля 2012 г.
Раççей регионĕсен правительствисен уççăнлăх рейтингĕнче Чăваш Ен 28-мĕш вырăнта. Федерацин Атăл çи округĕн регионĕсен хушшинче – 6-мĕш; Ульяновск, Пенза облаçĕсем, Пермь крайĕ, Оренбург облаçĕпе Удмурт Республики хыççăн. “Регнум” информаци агентстви пĕлтернĕ тăрăх çак кăтартусене Информаци обществин аталанăвĕн институчĕ 2012 çулта ака уйăхĕнче ирттернĕ тĕпчеве пĕтĕмлетнĕ хыççăн панă.
Ку индекса уçă правительствăн тăватă çул-йĕрне палăртакан кăтартусене тĕпе хурса шутлаççĕ.
1. Граждансемпе çыхăну тытма май паракан социаллă сетьсен сервисĕ, çав шута регионсен пуçлăхĕсем блогсем тытса пыни те кĕрет. Чăваш Енĕн ку енĕпе – 3 балл.
2. Правительствăн уçă кăтартăвĕсем – вĕсене çăмăллăнах тупма, пичетленĕ мелпех “кăларса илме” май пурри, саккунлăх. Чăваш Ен, влаç органĕсен порталĕллĕскер (унăн тытăмне регионри пĕтĕм ведомство тата вĕсене пăхăнакан организацисем, пĕтĕм муниципалитет, 300-е яхăн ял тăрăхĕ, çавăн пекех федераци тытăмĕсем, патшалăх пулăшăвĕсен порталĕ тата ыттисем кĕреççĕ), 7 бала тивĕçнĕ.
3. РФ субъекчĕсен влаç органĕсен политикине хатĕрленĕ, пурнăçа кĕртнĕ тата кăтартусене хакланă чухне граждансемпе онлайн мелĕпе çыхăнса ĕçлени. Кунта Чăваш Енĕн – 0 балл.
4. Интеграци (сеть сервисĕсем – граждансемпе хире-хирĕçле çыхăну йĕркелемелли тĕрлĕ хатĕрсем: ыйтăмсем, пĕлтерÿ хăмисем, форумсем, виртуаллă “йышăну пÿлĕмĕсем” (пулăшу ĕçĕсене электрон мелĕпе кÿни) – пурри. Ку енĕпе Чăваш Енĕн чи пысăк хаклавсенчен пĕри – 23 балл.
Кăтартусене правительствăсен официаллă тата 6 ведомствăн (вĕрентÿ, сывлăх сыхлавĕ, ĕçлев тата ĕçпе тивĕçтересси, социаллă хÿтлĕх, финанссем) веб-сайчĕсене тишкерсе хатĕрленĕ.