00:00 26 июня 2012 г.
Район администрацийĕн пуçлăхĕ эрне пуçламăшĕнче ирттерекен планеркăра муниципалитет ĕçĕ-хĕлĕн çивĕч ыйтăвĕсене сÿтсе явнă, иртнĕ эрнери ĕçсене пĕтĕмлетсе умри тĕллевсене палăртнă. Пухăннисем полицин районти уйрăмĕн пуçлăхĕ В.Обаськин, надзор ĕç уйрăмĕн пуçлăхĕн тивĕçĕсене пурнăçласа пыракан А.Фролов, Тăвайри тĕп больницăн тĕп врачĕн тивĕçĕсене пурнăçласа пыракан Т.Шакшина тухса каланисене итленĕ.
Июнĕн 27-мĕшĕнче районта Çамрăксен кунне паллă тăваççĕ. Çав ятпа Тăвайри ДЮСШн спорт комплексĕнче ĕçлекен çамрăксен районти Спартакиади пулать. Ăна кашни предприятипе организацирен хутшăнмалла.
Ялсене тирпей-илем кĕртес, шкулсен çурчĕсене юсас ĕçсем малалла пыраççĕ. Район центрĕнче çĕкленекен çĕнĕ физкультурăпа спорт комплексне тăвас, ун таврашне тирпей-илем кĕртес ĕçсем финишалла çывхараççĕ.
Планеркăра çавăн пекех нумай хваттерлĕ çуртсенчи хваттерсене кĕркуннепе хĕллехи вăхăтра харпăр хăй хутса ăшăтасси çине куçарас, налог пухассине лайăхлатас, муниципаллă пурлăхпа эффективлăрах усă курас тата ытти пĕлтерĕшлĕ ыйтусене пăхса тухнă.
О.ЛОМОНОСОВ, район администрацийĕн пай пуçлăхĕ.