00:00 29 ноября 2011 г.
Ноябрĕн 28-мĕшĕнче ял поселенийĕсен пуçлăхĕсен район администрацийĕн пуçлăхĕ çумĕнчи Совечĕн 12-мĕш анлă ларăвĕ пулнă. Унта ял поселенийĕсен пуçлăхĕсем, райадминистрацин структура подразделенийĕсен, ĕç тăвакан влаçăн федераллă тата республикăри органсен уйрăмĕсен, райцентрти предприятисемпе организацисен ертÿçисем хутшăннă. Ларăва ертсе пынă район администрацийĕн пуçлăхĕ Ю.Васильев кăçалхи 11 уйăхри ĕçсене пĕтĕмлетнĕ, çывăх малашлăх валли задачăсем палăртнă. Тĕп задачăсен шутĕнче – пур ялта та тротуарсемпе урамсене юртан вăхăтра тата пахалăхлă тасатса, урамсенчи çутта йĕркелесе тĕрĕслесе тăрасси, контейнерсенчи çÿп-çапа турттарса тухасси, ялсенчи компактлă, комплекслă стройка программипе пурнăçламалли ĕçсене вĕçлесси. Поселенисен пуçлăхĕсене ку задачăсемпе мерăсем йышăнма хушнă.
Декабрĕн 4-мĕшĕнче Раççейре сасăламалли пĕрлехи кун иртет. “Районта пурăнакансем Конституци паракан хăйсен правипе усă курса РФ Патшалăх Думин, Чăваш Республикин Патшалăх Канашĕн суйлавĕсене, çавăн пекех 6-мĕш суйлав округĕпе депутатсен районти Пухăвĕн депутатне, Элпуç ял тăрăхĕн депутачĕсен Пухăвĕн депутатне тата Элпуç, Тăвай, Чутей ял тăрăхĕсен пуçлăхĕсен хушма суйлавĕсене хутшăнччăр тесе районта мĕн кирлине йăлтах тăваççĕ. Декабрĕн 4-мĕшĕнче районти 29 суйлав участокĕ хăйсен алăкĕсене уçĕ”, – пĕлтернĕ пухăннисене Тăвай территори суйлав комиссийĕн председателĕ Н.Павлова. Район администрацийĕн пуçлăхĕ Ю.Васильев суйлавпа çыхăннă организацилле–техникăлла ыйтусене татса парассине тепĕр хут тĕрĕслесе тухма, пур службăсене те кал-кал ĕçлеме тата тимлĕ пулма ыйтнă.
Ларура çавăн пекех Çĕнĕ çул уявне хатĕрленес, çуртсен умĕсене илемлетес, елкăсем вырнаçтарас ыйтусене хускатнă.
Пухăннисем район прокурорĕ В.Николаев, полици уйрăмĕн начальникĕ В. Обаськин, пушар надзор уйрăмĕн начальникĕ А.Шакин, районти тĕп больницăн тĕп врачĕ Н.Бурдасова харпăр хăй участокĕнчи ĕç-хĕл çинчен пĕлтернине итленĕ.
Анлă ларура район аталанăвĕнчи пĕлтерĕшлĕ ытти ыйтусене те сÿтсе явнă.
О.ЛОМОНОСОВ.