00:00 06 сентября 2011 г.
Сентябрĕн 10-мĕшĕнче Тăвайри спорткомплекс территорийĕнче çăмăл атлетсен эстафета чупăвĕ пулать. Ăна Совет Союзĕн икĕ хутчен Геройне А.Г.Николаева асра тытса тата “Советская Чувашия” хаçат парнисемшĕн ирттереççĕ.
Ăмăртусене пĕтĕмĕшле пĕлÿ паракан шкулсен, организацисемпе учрежденисен тата предприятисен, ял тăрăхĕсемпе ялсен, район администрацийĕн управленийĕсемпе пайĕсен, ĕç тăвакан влаçăн федераллă органĕсен пайĕсемпе уйрăмĕсен командисем, спорт çемйисем хутшăнаççĕ.
Пĕтĕмĕшле тĕп тата вăтам пĕлÿ паракан шкулсен командисем 3-шер хĕрпе арçын ачаран "яшран", учительсен командисем 3-шер хĕрарăмпа 2-шер арçынран, предприятисемпе организацисен тата учрежденисен, ял тăрăхĕсемпе ялсен командисем 2-шер хĕрарăмпа 3-шер арçынран тăраççĕ. Район администрацийĕн управленийĕсемпе пайĕсен, федераллă тата республикăри службăсен командисенче 2-шер арçынпа 2-шер хĕрарăм. Спортпа туслă çемьесенчен ăмăртăва ашшĕпе амăшĕ тата 13 çултан аслă мар ачи хутшăнаççĕ. Ашшĕ 400, амăшĕ 300, ачи 100 метра чупаççĕ. Заявкăпа пĕрле ачан çуралнă хутне тăратмалла.
Командăри кашни участникăн 400 метра чупса тухса эстафета памалла. Мала тухнисене дипломсемпе хаклă парнесем парса хавхалантараççĕ.
Спорт çемйисем тата вăтам шкулсем хушшинче çĕнтерекен командăсене редакци 2012 çулăн пĕрремĕш çурришĕн район хаçатне тÿлевсĕр çырăнса парать.
Ăмăртусем ирхине 10 сехетре пуçланаççĕ.