00:00 09 августа 2011 г.
Халичченхинчен раснарах, 1986 çулта Чернобыль аварийĕн инкекĕсене пĕтерме хутшăннă çынсене асăнмалăх медальсем панинчен пуçланнă район администрацийĕнчи йăлана кĕнĕ черетлĕ планерка.
“Çав хăрушă аварие пĕтерме хăйсен сывлăхне те шеллемесĕр хастар хутшăннă çынсем пысăк хисепе тата тава тивĕç”,– палăртнă Ю.Е.Васильев. Наградăлас ĕçе Канаш хулин, Канаш тата Тăвай районĕсен çар комиссарĕ Ю.В.Барышов та хутшăннă.
Тырă пухса кĕртесси, выльăх-чĕрлĕх фермисене хĕле хатĕрлесси, ялсене тирпей-илем кĕртесси, хутса ăшăтмалли сезона хатĕрленесси – планеркăра тĕп ыйтусем пулнă. Администраци пуçлăхĕн пĕрремĕш çумне – АПК аталанăвĕпе экологи пайĕн пуçлăхне В.А. Ванеркене пĕрчĕллĕ тата пăрçа йышши тĕш тырă культурисене пухса кĕртессине августра вĕçлессине йĕркелеме, фермăсене хĕле хатĕрлес тĕллевпе пăхса тухассине, администраци пуçлăхĕн çумне – строительство, çул-йĕр, пурăнмалли çурт-йĕрпе коммуналлă хуçалăх пайĕн начальникне А.А.Алексеева нумай хутлă çуртсенчи харпăр хăй хваттерĕсене газификацилессине хăвăртлатма хушнă.
Администраци пуçлăхĕн контролĕнче – вĕрентÿ учрежденийĕсене çĕнĕ вĕренÿ çулне хатĕрлесе çитерессипе мĕнле ĕçлени те, вĕрентекенсен йăлана кĕнĕ августри канашлăвĕ те. Çавăн пекех унăн ĕç графикĕнче тунти кун Тăвайра физкультурăпа спорт комплексĕ тунă çĕрте тата “Çĕнĕ Пуянкассинчи пĕтĕмĕшле вăтам пĕлÿ паракан шкул” муниципаллă вĕрентÿ учрежденийĕнче, юсав пыракан çĕрте канашлусем ирттересси.
О.ЛОМОНОСОВ.