00:00 15 февраля 2011 г.
Нарăсăн 13-мĕшĕнче иртнĕ “Раççей йĕлтĕр йĕрĕ – 2011” массăллă чупу пĕтĕмлетĕвĕсене тунипе пуçланчĕ район администрацийĕнчи тунтикунхи планерка. Район администрацийĕн пуçлăхĕ Ю.Е.Васильев ăмăртусем аван иртнине палăртрĕ, çав вăхăтрах мероприятисене йĕркелесе ирттересси çине малашне тата тимлĕрех пăхма сĕнчĕ.
Иртнĕ эрнери ĕçсене пĕтĕмлетнĕ май, Юрий Егорович коммуналлă хуçалăх ĕçĕсене яланах тивĕçлĕ шайра туса пымалли пирки асăнчĕ. Çавăн пекех ял тăрăхĕсен сайчĕсене вăхăтра информацисем лартассипе начар ĕçленине палăртнă. Хальхи вăхăтра чылай çемьере компьютер, интернет пур. Нумай чухне çĕнĕ хыпарсене эпир интернет е интранет сечĕсем урлă пĕлетпĕр. Çавăнпа та сайтсене вăхăтра тата пахалăхлă информаципе тивĕçтерсех тăмаллине кăтартса панă.
Т.АРКАДЬЕВА.