00:00 06 июля 2010 г.
Кашни çулах утă уйăхĕн малтанхи канмалли кунĕсенче паллă тăваççĕ кооператорсем хăйсен професси уявне. Тăвайри спорткомплекса иртнĕ эрнекун пухăнчĕç вĕсем çак тĕллевпе. Вăрçă вăхăтĕнче вырăнтан-вырăна куçарма май пур кăмакапа салтаксем валли апат хатĕрленĕ. Паянхи кун та хăйĕн пĕлтерĕшне çухатман вăл. Кооператорсем пикенсех шÿрпе хатĕрлетчĕç асăннă кăмакапа. Ытти таварсене те туянма май туса панă кунта. Сцена умĕнчи тулли сĕтелсем кĕтрĕç уява пухăннисене.
Район пуçлăхĕ Н.Иванов кооператорсене ăшшăн саламларĕ, малашлăх тĕллевĕсене палăртрĕ, çăмăл мар ĕçĕсенче ăнăçусем сунчĕ. Маттур работниксене район администрацийĕн Хисеп грамотисемпе наградăларĕ.
“Тăвайри кооператив” потребобщество ертÿçи В.Федоров кăçал çур çул хушшинче хăйсем мĕнле ĕçлени çинчен кĕскен каласа пачĕ, пухăннисене уяв ячĕпе саламларĕ. Правлени председателĕпе С.Салминапа пĕрле вĕсем ырă тĕслĕх кăтартнă ĕçченсене Хисеп грамотисемпе, знаксемпе, удостоверенисемпе чысларĕç.
Культурăпа кану центрĕн работникĕсем тĕрлĕ ташăпа, юрăпа чылайччен савăнтарчĕç кооператорсене.
А.НИКИТИНА.
Сăн ÿкерчĕкре: “Тăвайри кооператив” потребобщество ертÿçи В.Федоров Е.Антонова тĕп хатĕрлевçе саламлать.
Сăн ÿкерчĕкĕ авторăн.