00:00 01 июня 2010 г.
Апрелĕн 14-мĕшĕнчен пуçласа майăн 14-мĕшĕччен районти вĕренÿ учрежденийĕсенче вут-кăвартан сыхланмалли “Асăрханăр, вут-кăвар” уйăхлăх пычĕ. Ятарласа туса хатĕрленĕ плансемпе килĕшÿллĕн шкулсенче вĕренекенсене асăннă темăпа диктантсемпе сочиненисем çыртарнă, викторинăсем, “Шăрпăк – ача вăййи мар” темăпа ÿкерчĕксен, “Пирĕн пата 01 шăнкăравламалла” ал ĕçĕсен, художество пултарулăх номерĕсен конкурсĕсем иртнĕ.
Уйăхлăх вăхăтĕнче çавăн пекех профилактика калаçăвĕсем, класс сехечĕсем йĕркеленĕ, ачасене пушар хăрушсăрлăхĕн правилисемпе тата вут-кăвара сÿнтермелли хатĕрсемпе паллаштарнă. Уроксенче инкекре харпăр хăйне мĕнле тытмаллине, вут-çулăма парăнтарассипе мĕнле кĕрешмеллине вĕрентнĕ.
Асăннă ыйтусенчен садиксем те пăрăнса юлман. Вĕсенче ачасемпе тата ашшĕ-амăшĕсемпе калаçусем ирттернĕ. Ачасемпе утренниксемпе конкурссем, вăйăсем йĕркеленĕ.
Пур вĕренÿ учрежденийĕнче те ачасене вут хыпса илнĕ çуртран илсе тухассипе практикăлла занятисем иртнĕ, вут-кăвартан сыхланмалли тата унпа кĕрешмелли майсене кăтартса панă стендсене çĕнетнĕ. Шкулсен библиотекисенче кĕнекесемпе журналсен куравĕсем йĕркеленĕ, класс сехечĕсем вăхăтĕнче кĕнекесенчи, хаçат-журналти статьясене тишкернĕ, сÿтсе явнă. Çак уйăхра çамрăк пушарниксем пур шкултан та районти ăмăртусене хутшăннă. Шкулсенче вĕренекенсемпе садиксен воспитанникĕсем Тăвайри пушар чаçĕнче экскурсире пулнă, инкек пулсан ăна сирсе ямалли пирвайхи хатĕрсемпе çывăх паллашнă.
З.СТЕПАНОВА, районти пушар чаçĕн инструкторĕ.